三姑六婆一人一個湊B方法 3個育兒謬誤令媽媽聽完都懶得解釋

By rachel.lo on 15 Apr 2019

每個新手爸媽必經階段，想必係遇到BB各式各樣狀況唔知點算好，而紛紛上網搵方法、甚至帶BB睇醫生，令爸媽逐漸掌握到唔少育兒知識，會識得用科學同有根據嘅方法去照顧BB。然而，身邊總會有人教你自己一套嘅湊B方式，尤其係年長一輩，總以自己經驗同諗法加諸喺新手爸媽身上，以下3個常見嘅育兒謬誤常常令新手爸媽不勝其煩：

Photo from Shutterstock

1. BB手腳凍唔夠暖

呢句常常出自老人家口中，一摸得BB手腳凍就覺得BB唔夠暖，要求父母將BB包到實一實。其實通常只有大人覺得冰冷會手腳凍；但係BB手腳冰冷就未必係因為凍，只係因為BB嘅心臟體積同四肢末端距離較遠，所以手腳會容易冰冷，如果為BB著太多衫，反而令BB感覺太熱，出現哭喊、睡眠變差、冇食欲！

其實想知BB凍唔凍嘅正確做法係，摸摸BB嘅後頸同背部會較準確。另外，爸媽亦可以參考自己嘅體溫感覺，BB比自己著多一件衫就足夠。

Photo from Shutterstock

2. 珍珠粉抹BB口

初生BB成日喊，有啲老人家會叫爸媽用珍珠粉搽BB口、俾BB食落肚「定驚」。但係BB喺4個月或以前，消化系統未發育成熟，根本唔應該餵食奶以外嘅食品，否則有機會令腸道出現阻塞、甚至死亡。加上珍珠粉「定驚」一說並無實質根據，而珍珠粉始終係中成藥，加上市面上售賣嘅品質參差，對BB健康有一定風險，有蠶豆症嘅BB更係禁止服用。