麻疹個案至今已累計達61宗 有孕婦首度中招

麻疹爆發，衛生防護中心公布，有28歲孕婦感染麻疹，成本港今年首宗孕婦感染個案，而麻疹個案至今已累計達61宗。

衛生防護中心指，受感染嘅孕媽媽過往健康紀錄良好，無外遊紀錄，亦曾接種2劑麻疹疫苗。患疹媽媽於4日前出疹，翌日已到博愛醫院急症室求醫，同日轉送屯門醫院入院接受治療，暫時情況穩定。根據孕媽媽提供嘅資料指出，潛伏期內無接觸過麻疹病人，而家人至今亦無出現病徵，但就正接受醫學監察。

另外，初步調查顯示，患疹媽媽喺傳染期內曾到衞生署轄下元朗容鳳書母嬰健康院進行定期產前產檢，衞生署已向健康院指示，並加強執行各項感染控制措施，包括加強清潔及消毒、加強通風、提醒職員及到訪人士嚴格執行佩戴口罩同清潔雙手等感染控制措施，相關調查及追蹤工作會繼續進行。

而較早前亦有1名11個月大男嬰同1名2歲女童感染麻疹，過往健康紀錄良好，初時亦出現發燒，男嬰喺病毒傳染期都居住深圳，而女童亦有前往，而男嬰就未有接種疫苗，女童就有接種1劑，兩人情況暫時穩定。

衞生署呼籲，孕婦及未滿一歲兒童，尤其是抵抗力弱人士，要避免前往人多擠逼嘅地方同避免同未有免疫力人士接觸；亦提醒，麻疹潛伏期（即由感染後到發病時間）為7至21日。市民可以留意有關麻疹病徵，包括發燒、皮膚出現紅疹、咳嗽、流鼻水同眼紅等。當出現相關病徵，應戴上外科口罩，停止上班或上學，並及早求醫。」

Text：Mami Editorial

Sources：衞生防護中心