外國母乳媽媽搞笑手繪5幅漫畫道出半夜慘況 BB扎醒喊住吸奶而老公瞓得超香

母乳媽媽唔易做，尤其係當忙咗一日，連夜晚僅餘可休息嘅瞓覺時間都因為BB半夜扎醒要飲奶而被迫中斷，令媽媽攰到爆燈！美國一名母乳媽媽喺半夜因聽到女兒喊聲，趕緊將女兒抱入懷中餵哺母乳，希望可以好媽安撫女兒重新入睡，然而期間不停被女兒掙扎同拳打腳踢，而瞓喺身邊嘅老公絲毫唔察覺仲瞓得好好，好唔容易捱到天光，成晚冇覺好瞓嘅媽媽早已疲累不堪，然而老公就精神爽利伸懶腰仲問自己瞓得好唔好，心理唔平衡嘅媽媽就用5幅手繪畫去話俾老公聽自己瞓成點，幽默搞笑嘅畫作令網友都笑瘋了表示：「太寫實啊！」

呢位媽媽叫做Mattea Goff，同老公育有2名女兒，小女兒只有5個月大，由於係親餵關係，媽媽經常半夜都要起身餵女兒母乳，長期缺乏足夠嘅休息，所以媽媽嘅脾氣都變得非常差，不過老公就完全唔理解自己嘅苦況。

於是Mattea為咗俾老公了解一下自己每晚經歷緊咩事，就用手繪形式畫咗5幅漫畫，描述半夜到早上喺老公唔知情嘅時刻，自己同女兒喺餵母乳時常常會發生嘅事。

一開始，大家都好平靜咁瞓喺自己嘅床上，而小女兒就瞓喺床邊嘅睡籃。兩個鐘後，小女兒開始哭喊，瞓喺隔離嘅媽媽第一時間驚醒，而老公懵然不知繼續熟睡。

媽媽唯有將小女兒抱到自己胸前，想用餵母乳安撫女兒，但係女兒並冇因為咁而安靜落黎，反而不停掙扎同拳打腳踢，好眼瞓嘅媽媽默默忍受呢一切，而老公仍然熟睡中。

媽媽終於順利餵到小女兒飲母乳，不過睇黎小女兒嘅指甲抓痛媽媽，所以媽媽諗住係時候要幫小女兒剪指甲，另一邊老公仍然熟睡，但Mattea搞笑咁畫出老公兩點乳頭，仲標示住「冇用嘅乳頭」，可見媽媽非常不爽老公啊！之後女兒飲飲下仲吐奶，媽媽又要起身幫女兒清潔！

女兒終於瞓著，但對腳仍然踢住媽媽，下一刻女兒又好快醒咗又要飲奶，老公仍然無感繼續瞓之餘仲成張被搶走埋，凍冰冰嘅媽媽唔得閒去搶返張被，仲要擔心點解女兒會流汗。

最後，媽媽終於捱到天光，老公都瞓醒，好笑在Mattea用藍色筆畫出自己嘅黑眼圈同身上瘀痕，而老公身上仍掛住兩點「冇用嘅乳頭」，精神爽利同自己講：「親愛的，早晨啊！琴晚係咪瞓得好好呢？黎擁抱返一個～」

其實，真係好難怪媽媽會嬲㗎！希望爸爸睇完媽媽嘅畫作告白後，會體諒媽媽嘅難處，同埋多啲幫媽媽手，俾媽媽有時間休息下！

Text：Mami Editorial

Photo Sources： Mattea Goff @ Facebook