懷孕後胎兒變大令媽媽內臟移晒位 令人難以置信媽媽竟然咁忍得！

孕媽媽喺陀住BB嘅後期，肚子非常巨大，孕媽媽亦會感到好多生理上嘅唔舒服，如：難以呼吸、夜尿頻繁、腰酸背痛⋯⋯等現象，原來呢啲難受現象通通係源於媽媽嘅內臟大移位所致！而移位程度大得令人難以置信，懷孕媽媽嘅忍耐力真係太強喇！

子宮本來只有一個拳頭咁大，但隨著胎兒一日一日長，子宮亦會慢慢被日漸龐大嘅胎兒撐大，變成西瓜嘅尺寸。但孕媽媽嘅腹腔空間有限，於是變大嘅子宮會壓迫媽媽體內嘅內臟，令內臟深受壓力，令孕媽媽出現各種不適。

當中最受壓迫嘅係孕媽媽嘅胃、腸、膀胱同脊椎。

媽媽嘅胃部會被擠壓到上方，胃部嘅變形令胃容量變小，所以好多孕媽媽喺懷孕後期成日都會冇咩食慾，餓得快但食少少又好快食唔落，所以經常要少食多餐。

另外，媽媽嘅腸亦會被擠壓到腹腔嘅兩側同上方，令腸道蠕動減慢同消化功能變弱，令孕媽媽更冇食慾。

幾乎所有媽媽都會經歷嘅最大煩惱，就係出現尿頻，明明啱啱去完廁所冇耐，話咁快又要去多次，而尿量又唔多，呢個亦係膀胱受到子宮擠迫所致。好多媽媽都會嘆氣，夜晚經常夜尿頻繁，令睡眠質素變得非常差，整個人更易疲倦冇精神。

而胎兒嘅重量加上子宮中大量羊水，令到孕媽媽嘅肚變得又重又大，突起嘅巨肚會令孕媽媽嘅身體重心向前，從而令脊椎受到巨大壓力，會出現變形、彎曲，令媽媽常常感到腰酸背痛。

孕媽媽要承受嘅轉變同身體不適真係非常大，所以爸爸們都要好好愛錫同珍惜呢位願意同你生兒育女嘅太太啊！

Text：Mami Editorial

Photo Source： Shutter, Pinterest