日本攝影師患癌剩三年命 每日為兒子拍照紀錄生命最後美好片段

當孩子出世後，爸爸媽媽都會沉醉喺成為父母嘅喜悅當中，盡情感受新生命帶黎嘅美好。但若然喺呢個幸福時刻，你被告知只剩下三年生命，你又會有咩感覺呢？由天堂掉落地獄嘅痛苦，正正係日本一名36歲攝影師爸爸幡野廣志經歷緊嘅事，孩子喺2016年出世，但自己就喺2017年確診患上血癌，醫生推斷只剩下3至5年壽命。

面對出生冇耐嘅兒子同相愛嘅妻子，作為爸爸嘅廣志感到非常抱歉、不捨同傷心，不過縱然再難過、怨恨上天嘅殘忍安排，自己亦實在無法扭轉自己嘅命運。

面對將盡嘅生命，廣志決定為自己同兒子準備最後一份禮物，用自己最擅長嘅攝影紀錄低同兒子最後嘅相處時光，由孩子喺一無所知嘅BB階段，到會笑、會跑、會擁抱爸爸，每張相中兒子嘅成長同進步，彷彿都睇到爸爸廣志喺鏡頭後嘅微笑，感受到作為爸爸感到嘅欣慰同驕傲。

由得知自己患病開始，廣志已暫停手上一切工作，每日珍惜同兒子相處嘅時光，只為兒子拍照紀錄生活片段。

時至今日，兒子已經2歲半，廣志坦言，兒子並唔明白生死，自己只希望喺生命最後時光，留下呢批相片話畀兒子聽，自己有幾愛佢，當自己離開之後，兒子仍然可以快樂生活落去。

爸爸媽媽都希望睇到自己嘅孩子長大，但對廣志而言，孩子一日一日嘅成長，就意味著爸爸嘅壽命正在倒數住結束，一方面樂於見到兒子長大，另一方面非常唔捨得要同兒子分開，呢種心情真係非常複雜又沉重⋯⋯

廣志喺上年更以兒子為題舉辦攝影展「優しい写真」(溫柔的畫面)同出版寫真集，為兒子送上非常特別嘅「最後禮物」。

幸福唔係必然，有緣成為一家人，請好好珍惜彼此。

Text：Mami Editorial

Photo Sources：幡野廣志 @ Twitter