生咗3個都咁fit 背後其實好努力！張柏芝：不管多忙 女人也要保持自己的價值

藝人張柏芝上年年尾生咗第三胎之後，身材回復得好快，簡直同未生之前完全冇分別。唔好以為今年39歲嘅柏芝，身形係天生咁好，原來多年嚟佢喺背後付出好多努力先有呢個成果。

今日柏芝喺社交網站到表示，好多人問佢點解生咗三個仔都唔似生過仔嘅媽媽，原因好簡單，就係付出。柏芝鼓勵更各位媽媽：「不管多忙，女人要保持心態、毅力、身形和自己的價值，不容許自己有任何藉口放棄自己原則和規律。」仲貼上咗一張做緊珈瑜嘅相，力證自己經常運動，先keep到好身材。

A post shared by 柏芝 (@cecilia_pakchi_cheung) on Mar 27, 2019 at 1:21am PDT

冇錯！有付出先會有收穫，其實柏芝除咗為自己努力之外，為咗3個囝囝佢都付出好多。唔止每日準時5點半起身煮早餐同餵奶，仲會親自車佢哋返學放學。等Lucas同Quintus返到屋企之後又會陪佢哋睇卡通片，夜晚又會煮晚餐、陪佢哋瞓覺，閒時又會帶埋囝囝一齊行山，湊仔呢樣嘢絕不假手於人。

見到兩個仔咁黐佢，母子感情咁深，就知道佢為Lucas同Quintus付出幾多心機、時間。做媽媽為仔女一定係不計付出，柏芝都勉勵大家：「加油各位媽媽，女士們！」

Text：Mami Editorial
Source：張柏芝 @Instagram、微博