BB瞓晏覺嘅時間最好用！ 趁BB瞓覺要趕緊做5件事

生咗BB後，相信媽媽經常會聽到一句說話：「BB瞓你就瞓！」大家聽完都係一笑置之，難得BB瞓著覺喎！呢啲咁好用嘅時間梗係要趕緊做以下呢5件事。

1. 為BB剪指甲

BB剪甲長得特別快，幾乎每兩日就要剪一次，但醒著嘅BB又點會乖乖就範，最好梗係趁BB瞓冧咗，神不知鬼不覺咁剪咗佢，快靚正就剪完，仲有時間慢慢修靚甲邊添！

2. 為BB剪頭髮

BB啲頭髮長到拮眼，但一為BB戴頭飾總會好快被BB扯落黎，當BB瞓咗覺，可以好利落咁用剪刀為BB修剪好前陰，又唔怕BB亂郁而被剪刀所傷！

3. 為BB清潔鼻水鼻垢

當BB傷風感冒流鼻水，或鼻垢黐喺鼻孔邊緣，BB點捽都捽唔甩，爸爸媽媽都會好好趁BB瞓覺嘅時候，幫BB鼻孔進行清潔工程，熟睡中嘅BB毫無反抗力，就算用BB平時最討厭嘅吸鼻器都可以輕鬆完成任務！

4. 做家務

BB醒著嘅時候總係黐著媽媽，令媽媽難以做家務，趁BB瞓咗當然係快快做晒所有家務嘅時候，通常做完想抖下嗰陣BB就會瞓醒⋯⋯

5. 爸爸媽媽嘅MeTime

當BB瞓咗覺而上述嘅工作都做完或唔需要做，爸爸媽媽先真真正正可以享有metime時間，滑手機、睇電視、瞓陣覺、嘆下飯⋯⋯簡直係爸媽嘅小確幸時間。

Text：Mami Editorial

Photo Sources：Shutterstock