冇工人湊屋企人又唔得閒？善用社會福利署嘅幼兒服務全港18區育嬰託兒服務一覽

By rachel.lo on 26 Mar 2019

無論係雙職父母，抑或係全職媽媽都好，相信都曾有過經歷係工人忽然放假／請辭，或係自己同屋企人有緊急事無法看管小朋友，呢一刻都會感到好彷徨，但原來社會福利署有唔同幼兒服務，如：幼兒中心、幼兒暫託服務、延長時間服務、互助幼兒中心、鄰里支援幼兒照顧計劃等，幫助有需要嘅爸爸媽媽解決燃眉之急。

1.日間幼兒中心

為0-3歲嬰幼兒提供日間照顧服務，服務時間為星期一至五上午8時至下午6時，星期六上午8時至下午1時。唔同幼兒中心嘅收費不一，有提供半日、全日、或按小時收費。

下載：受資助及私營/非牟利的幼兒中心名單

2. 暫託幼兒服務

由部份幼兒中心同幼稚園暨幼兒中心為2歲以上幼兒提供全日、半日或每節兩小時嘅暫託幼兒照顧服務，以協助需要處理突發事情或其他事宜嘅家長。暫託幼兒服務嘅時間為星期一至五上午8時至下午6時，星期六上午8時至下午1時。暫託幼兒服務收費：全日$64，半日$32，每兩小時一節為$16；另加膳食費$6.5。要留意由於名額有限，部分學校或須要事前親身或透過電話登記確認，詳情請致電學校查詢。

3. 延長時間服務

提供較長時間幼兒照顧服務，以滿足有社會需要嘅家庭同雙職父母。延長時間服務嘅時間一般為星期一至五下午6時至晚上8時，星期六下午1時至下午3時或8時。（個別中心嘅服務時間會因應服務需要而有所調整。）收費為每小時$13。

下載：有暫託幼兒服務及延長時間服務嘅幼兒中心及幼稚園暨幼兒中心名單

4. 互助幼兒中心

社署為推廣社區居民發揮鄰里互助精神，同地區有關機構合作，由非牟利團體為0-6歲嬰幼兒提供照顧服務，令社區內有需要嘅家庭享有短暫幼兒照顧服務，避免幼兒因獨自留喺家中而發生意外。

下載：互助幼兒中心名單

5. 鄰里支援幼兒照顧計劃

社署為推廣社區居民發揮鄰里互助精神，同地區有關機構合作，為9歲以下兒童提有彈性嘅幼兒照顧服務，同時促進社區參與同鄰里互助。互助幼兒中心屬於非牟利服務，主要係由家長或義工以互助幼兒小組形式提供彈性嘅幼兒照顧服務。呢個計劃分別有家居照顧服務同中心託管小組服務。家居照顧服務時間為上午七時至晚上十一時，中心託管小組開放時間至晚上，喺部分週末同部分公眾假期亦會提供服務。