做左媽媽，自然就會擁有呢股不可思議嘅力量

媽媽對自己嘅小朋友都有一份情有獨鍾嘅愛，呢份特別嘅母愛就係媽媽照顧、愛錫、同埋保護小朋友嘅動力來源。有時候，媽媽做嘅事，就連爸爸都覺得驚訝。

1. 生BB時痛到死去活來 仲想再追多個

唔知係湊BB令媽媽唔夠休息變得記性差，定係大自然裡面設定好嘅定律，總之，大部份生過BB嘅媽媽都唔怕生產時嘅十級痛楚，會想再生多一個或者幾個BB。呢件事，我諗唔止爸爸，可能就連媽媽自己都覺得不可思議。

2. 真心鍾意BB嘅汗味

媽媽係BB嘅超級粉絲。相信，好多媽媽都好鍾意聞吓自己個BB身上嗰種味道。就算係汗味，都鍾意；就算BB已經長大成為小朋友，都鍾意。

3. 溫柔嘅惡媽可以一人分飾兩角，而且瞬間變臉

就算媽媽教訓小朋友時會好惡，好多小朋友開始學寫作嘅時候，都一定會寫「我的媽媽很溫柔」。原因好簡單，媽媽有溫柔嘅一面，亦有好惡嘅一面，最神奇嘅係佢地可以瞬間變臉。

Text: Mami Editorial