已收奶一段時間 當乳房冇奶水出 仲可能重新追奶？媽媽再度泌乳攻略

好多媽媽都曾經疑問過，已經收咗奶一段時間，但希望重新餵返BB飲母乳，有可能嗎？答案係可以，只係當媽媽停止哺乳後一段長時間，大腦會慢慢接收到BB唔再需要飲母乳嘅訊息，會開始下令乳房停止造奶，要重新再追奶嘅話，絕對比啱啱生產後更加困難，所以媽媽要有更多耐性同恆心先能夠成功追奶至餵全母乳。

有媽媽分享自己已停餵母乳長達數月，乳房已經無法擠出乳汁嘅情況下，仍然可以再度泌乳，由無到餵至全母乳嘅過程足足需要5個月時間。

台灣母乳協會發起人曾撰文表示，無論停餵幾耐嘅媽媽都有可能再度泌乳，而BB月齡愈小，媽媽重新上奶會更易。不過由無到有嘅追奶過程都需要一段時間，如果BB仲細，當然非常鼓勵媽媽重新嘗試；但如果BB已大至以副食品為主食，媽媽亦要好好考慮到底係咪真係有需要令BB重新食母乳，如對奶粉唔適應等。

重新刺激泌乳嘅方法如下：

1. 盡量埋身餵

BB嘅吸吮同口水係最有效刺激乳房造奶！外國曾有研究，親餵嘅好處係當BB嘅口水接觸到乳頭，會有訊息傳送到大腦再下令乳房根據BB嘅成長狀況去改變乳汁成分，更貼合呢一刻BB嘅需要！外國有媽媽親餵生病嘅BB，發玩一邊被BB吸吮過嘅乳房會分泌出比另一邊偏黃色嘅乳汁，明顯睇到抗體更多！非常神奇！但已離乳一段時間嘅BB好可能已經忘記點樣吸吮乳頭，媽媽可以每日幾次咁試將幾滴配方奶滴喺乳頭上引BB去吸吮，以刺激乳頭分泌出乳汁。

2. 密密手擠或泵乳汁

媽媽喺啱啱開始嘅時候，可以每隔2個鐘，手擠或同電泵刺激乳頭約15分鐘，諗多啲BB飲奶嘅樣，令大腦接收到BB要食奶嘅訊息，令乳房重新恢復造奶。一開始可能冇奶出，但密密刺激就會慢慢有希望，手擠會比電泵效果更佳！

3. 次數密比時間長更重要

媽媽們可以一有時間就去洗手間或自己房間內擠下乳頭刺激乳房，一日刺激乳房幾次比起次數短但擠得耐更有效。

對BB而言，母乳始終比配方奶有更全面嘅營養、更易消化同吸收，如果媽媽想嘅話，絕對可以重新出發再次向母乳之路進發！

Text：Mami Editorial

Photo Sources：Shutterstock