日本育嬰間令人大開眼界 媽媽們睇到都覺得好羨慕

帶BB出門，相信爸爸媽媽們都好常帶BB去商場嘅育嬰間，不過好多育嬰間每次只容納到一個家庭進入，對於好多母乳媽媽而言，每次都要等好耐，一方面乳房脹痛得非常難受，另一方面BB又肚餓到哇哇大喊，非常狠狽！而對於爸爸而言，當商場冇育嬰間，而換片枱又只有女廁先有，亦會非常頭痛！當香港嘅育嬰設施令人感到失望，日本喺呢方面就明顯體貼得多，育嬰間設計得非常溫馨！

日本會考慮到照顧嬰幼兒父母嘅需要，好多地方都會設有育嬰室，如百貨公司、遊樂場、公園、書店等，但凡嬰幼兒有機會去到嘅地方，都總會有一間育嬰室。而育嬰室嘅設備亦非常完善，喺呢方面都真係要讚一讚日本人嘅細心，如哺乳區同育嬰間會分開，方便同一時間幾個母乳媽媽可以喺哺乳區餵奶，而其他爸爸媽媽可以喺育嬰間為BB換片，而唔洗苦苦等候太耐。

而日本亦有網站同app可以俾爸爸媽媽隨時查到每個地方邊到有育嬰室，同育嬰室內有咩設備，令父母出門都絕對唔會手忙腳亂，非常抵讚！

呢啲育嬰間好多都會門口都會標有中英日韓4種語言，方便當地人同遊客使用，所以如果爸爸媽媽要去日本旅行都相當方便～

雖然香港都有啲大型商場會有設備完善嘅育嬰室，不過數量太少唔足以應付好多爸爸媽媽嘅需要，希望香港有關方面都會重視一下爸爸媽媽嘅需要，改善一下育嬰方面嘅措施，令爸爸媽媽出門都可以方便得多！

Text：Mami Editorial

Photo Sources：Pinterest