生大寶係大無畏 再生二寶好需要勇氣 媽媽懷第二胎5個大不同

當生咗大寶之後，媽媽們生活都起咗翻天覆地嘅變化，每日總係忙東忙西去照顧BB，幾乎冇自己嘅私人時間，而自己勢估唔到竟然仲會有想生第二胎嘅諗法，全希望令大寶有一個伴，以後無論吃喝玩樂都有一個弟妹同佢經歷呢一切，即使明知自己之後嘅生活會更忙更攰都在所不計。然而，當真係懷有二寶，已有第一胎經驗嘅媽媽先發覺呢次懷孕亦係全新嘅體驗！

1. 冇得再做女王

陀著第一胎時，總會做咩都小心翼翼，行路要慢慢行、唔可以搬重物、盡量多休息，老公亦會貼身保護太太、安撫孕媽媽情緒，凡事照顧周到，享受好似女王一樣嘅待遇。但陀著第二胎嘅時候，媽媽由被照顧嘅身份變成照顧大寶，雖然爸爸媽媽經常會向大寶灌輸媽媽肚內有小寶寶嘅事，但係年紀尚少嘅大寶似懂非懂，無法完全理解到媽媽體力上有咩局限，所以媽媽都會好似平常咁抱抱大寶、快步追著大寶、照顧大寶起居飲食，可以休息嘅時間並唔多，相比起陀一胎保護BB嘅難度更高。

2. 身邊人冇咁著緊

好多人都會覺得，媽媽有過一次經驗，應該對懷孕嘅一切駕輕就熟，連另一半都會覺得你應該有能力好好照顧自己，而冇咁著緊孕媽媽。的確，媽媽唔再係第一次「一舊雲」狀態，已經會知道好多懷孕注意事項，但係對於一邊陀著BB，一邊湊住孩子嘅狀況仍然係「新手媽媽」一名，依然好需要另一半幫手照顧自己、湊孩子同排解自己嘅負面情緒。

3. 要照顧大寶情緒

為咗唔令大寶覺得媽媽陀住二寶之後會對大寶冷淡咗，所以媽媽都會忍受住精神同體力嘅不適，產前抑鬱可能會更嚴重，但媽媽都會想優先照顧好大寶嘅情緒，盡量好似平時咁同大寶玩、傾計、出街，向大寶講多啲小寶寶嘅事，等大寶可以接受同期待著小寶寶出世。

4. 孕反應更強烈

每次懷孕都係完全唔同嘅體驗，媽媽可能喺陀第一胎嘅時候冇咩孕吐反應，或好後期先出現水腫、半夜腳抽筋嘅現象，但喺陀第二胎就完全相反，但無論媽媽幾唔舒服都好，都希望唔會打亂到大寶嘅生活作息，所以媽媽比起平時更加疲倦。

5. 恐懼再次面臨生產痛

正正因為有過第一次經驗，懷二胎媽媽更清楚生仔有幾痛苦，並唔會因為咁而唔怕痛，加上通常健康院都會話生第二胎嘅產程會較快，媽媽雖然一方面會慶幸自己痛得冇得耐，另一方面就擔心宮頸開更快會唔會更痛、再入產房等如再踏入鬼門關好怕會出意外、大寶到時冇人照顧⋯⋯心理壓力更大。

雖然要再冒一次險、私人時間會更少、照顧孩子會更辛苦，但媽媽們都會為咗孩子無怨無悔！

Text：Mami Editorial

Photo Source：Shutterstock, Pinterest