例行工作唔再感枯燥無味 因為BB而變得充滿樂趣 BB幫媽媽做家務5個有趣情境

當見到媽媽做家務，BB都會望到實一實，然後伸出友善之手想幫媽媽一把，媽媽常常都會被BB嘅舉動逗得不亦樂乎，一方面開心BB長大可以做個小幫手，另一方面對於BB愈幫愈忙感到啼笑皆非，以下呢5個情境媽媽們又有冇覺得非常熟悉呢？

1. 將衣夾散滿一地

當媽媽晾衫時需要用到衣夾，家務小幫手就會即刻走出黎，守護住一籃衣夾，媽媽開口叫BB俾衣夾自己時，BB一開始都會好乖咁幫手遞俾媽媽，但慢慢BB就會發現到衣夾嘅無限玩法，如： 拎去玩煮飯仔、倒滿一地再逐個執、穿上手指當戒指⋯⋯媽媽點叫BB俾自己，BB都充耳不聞，放棄幫媽媽手～

2. 收埋一隻襪

趁媽媽摺緊衫、將衣物分類嘅時候，家務小幫手又會再衝出黎，好順手拎咗一隻襪去，然後悄悄收埋去某個地方，到媽媽發現時已經太遲，要不停翻找全屋每個角落、BB玩具箱、小馬桶等⋯⋯搵唔到嘅話唯有隨緣等隻襪出返黎。

3. 將衣架上嘅衣物扯落黎

當媽媽將衣物夾好晒之後，家務小幫手就會被逐件夾起嘅衣物非常感興趣，趁媽媽未晾起之前，「幫」媽媽逐件扯返晒落黎，然後感到非常自豪咁開心拍掌或跳舞，令媽媽好笑又無言。

4. 拎內衣褲去玩

除咗襪，胸圍同內褲呢啲細件衣物都會好順手俾BB拎去玩、fing黎fing去～當媽媽想搶返，BB就會發脾氣唔肯俾，變成媽媽同BB拉扯內衣褲嘅尷尬畫面（好彩只係喺屋企）。

5. 將櫃桶內物件剿晒出黎

有時當媽媽拉開櫃桶想放衣物，冷不防會有一隻奇怪嘅小手伸過黎嚇媽媽一跳，如果媽媽任由BB繼續嘅話，BB就會將櫃桶內嘅嘢通通剿出黎，再塞返入去，重複又重複玩得好開心。

Text：Mami Editorial

Photo Source：Shutterstock