戴上身真係好需要勇氣！日本公司新發明爸爸哺乳神器

埋身餵哺BB將唔再係媽媽嘅專利！日本公司Dentsu日前喺美國科技展覽中，推出全新發明「爸爸餵奶神器」（ father’s nursing assistant ），號稱以女性乳房為設計藍本，特登整出黎俾爸爸配戴，等爸爸可以假扮一下媽媽去餵哺BB，減輕產後媽媽嘅負擔！

呢款設計據稱係根據兒科醫生嘅建議製作而成嘅可穿戴設備，外型酷似女性雙乳，可盛載母乳或配方奶，其中一側「乳房」設有奶嘴俾BB吸吮。

或者有人會覺得呢個設計好多餘，爸爸用奶樽餵咪得！但原來呢個發明除咗餵奶之外，仲會自動加熱模仿媽媽體溫同會輕微震動，去幫助BB入眠。另外仲可以紀錄低BB睡眠同餵食情況，方便父母透過程式查看BB相關數據。

呢間公司喺官網上表示，明白到母乳媽媽餵哺BB嘅難處，希望呢個設計可以鼓勵爸爸喺育兒上發揮到更佳嘅作用，減少媽媽嘅壓力同負擔。

不過各位媽媽唔好太開心住、爸爸都唔好太興奮住！因為呢個發明仲係概念性階段，未正式推出，有興趣嘅爸爸媽媽唯有期待一下！

Text：Mami Editorial

Photo Source：Dentsu