【比同齡BB更加懂事聽話 但原來背後有段痛心故事】

網絡熱傳有位2歲BB熟用筷子食嘢，唔少網民都留言話依位BB好叻好可愛，但懂事背後原來有段令人心痛嘅故事。

有筷子神童之稱嘅海海，1歲時被診斷患有白血病，直到至今仍然要接受化療，暫時只能靠輸血打針維持生命。海海媽媽指，其實海海識用筷子係因為藥物激素用多，令到海海成日肚餓，佢嫌大人餵食太慢，所以就搶筷子模仿大人夾住食，結果唔夠2歲就已經好熟練。

海海自己快手食飯嘅影片，喺網絡上接近過十萬播放率同分享，網民都大讚海海好懂事，但一諗到海海懂事源自於化療、打針、食藥嘅病痛就令人好心痛。

海海初生時係由嫲嫲照顧，但嫲嫲喺海海8個月時被診斷乳癌晚期，開始時全家都為嫲嫲病患奔波，可惜禍不單行，過兩個月後發現海海亦患上血癌，令全家雪上加霜。當嫲嫲得知後，多次放棄治療，希望留返啲錢畀孫治療。

雖然年紀細細，但海海十分懂事，即使知道藥係好苦，只要媽媽放到嘴邊，海海都會吞，因為海海知道「食藥就會好！」除咗食藥，海海長時間喺醫院打點滴，點滴點完，海海就自己走去醫生房，話畀醫生聽「我嘅藥無喇～」患病初期，海海仲會自己拎霧化器幫自己進行霧化治療。

海海到依家已經接受過30次腰穿同10次骨穿，腰穿係指醫生用針拮入腰部後，從椎骨間隙內抽取出一定數量液體，大人知道都覺得好辛苦，但海海仍然努力堅持接受治療，更有次佢突然喺化療前搵爸爸，但爸爸要到照顧嫲嫲陪唔到自己，聽到爸爸嚟唔到，佢無扭計，只係偷偷地喊，媽媽見海海似懂非懂嘅行為都非常痛心。

海海仲有一個9歲家姐，家姐好痛錫細佬，睇住海海因化療而光頭，家姐將自己嘅頭髮剪下，幫海海留咗一段瀏海！希望可以係依段經歷陪住細佬，早日能夠康復！

Text：Mami Editorial

Sources：海海@微博