小朋友似十足迷你版嘅自己或者另一半

小朋友就好似一張白紙一樣，學習同模仿都好快，爸爸、媽媽、照顧者、同埋同學朋友都係佢地嘅學習對象。所以，好多時候屋企都會多左一個迷你版嘅自己，或者一個翻版另一半，有時候，真係唔知好嬲定好笑。

1. 一模一樣嘅口頭禪

小朋友嘅口頭禪，好可能就係爸爸或媽媽嘅口頭禪。佢地最常聽到嘅說話，就會係佢地最常講嘅嘢，而且係最自然、最不經意就會講出口嘅說話。

2. 相似嘅表情動作

笑又好、喊又好、或者係一啲好簡單嘅表情反應，都可以喺小朋友身上搵到爸爸媽媽嘅影子。所以，大家成日都話身教好緊要，而且比言教有效百倍呢。

3. 類似嘅生活喜好同習慣

唔知係唔係基因遺傳嘅關係，仔囡總有啲生活習慣同埋喜好，係同爸爸媽媽一樣嘅，又或者原因好簡單，就係佢地特別愛爸爸媽媽，爸爸媽媽嘅所有嘢都係好嘅。例如：仔仔同爸爸坐喺梳化睇電視嘅姿勢機乎一樣，又或者，囡囡撥頭髮嘅動作同媽媽一模一樣。

Text: Mami Editorial