奶量唔夠 媽媽內心掙扎補奶粉 母乳媽媽補奶粉3件感到心酸嘅事

喺BB出世前，好多媽媽一心打算等BB出世後就餵BB飲人奶，希望將最好嘅禮物送畀BB。但係當母乳之路正式展開時，先發現原來餵母乳比想像中難得多，經常擔心自己奶量唔夠，BB食唔飽而總係不停哭喊要飲奶、體重下跌⋯⋯令產後情緒不穩嘅媽媽感到非常大壓力，為咗可以追奶量而密密泵奶，休息時間變相更少。連身邊人都唔忍心睇到媽媽咁辛苦自己，小心翼翼建議媽媽不如補奶粉畀BB，媽媽們雖然內心萬般希望BB可以全母乳餵哺，但為咗應付燃眉之急令BB體重上升返、減輕自己壓力，都開始混合餵養BB，不過仍然會有3個感到辛酸之處：

1. BB唔識得埋身餵

好多母乳媽媽都好享受埋身餵BB，同BB肌膚之親嘅一刻，會覺得自己同BB無比親密。但係混養餵哺BB，有啲BB會比較鍾意飲奶樽，因為相比起吸吮乳房，可以用較少氣力去飲更多嘅奶，輕輕鬆鬆就飲得飽足。當媽媽想埋身餵母乳時，BB會因為飲得奶樽多而出現乳頭混淆，唔識得吸吮乳頭而亂咬令媽媽感痛楚，或嫌吸吮乳頭辛苦而推開媽媽，心酸嘅媽媽唯有將母乳泵出黎用奶樽餵BB。

2. 奶量追唔上

有媽媽曾反映，當混合餵奶粉之後，BB冇再埋身餵，無法利用BB嘅吸吮去有效刺激乳房造奶，想增加奶量只好靠密密泵嘅方法⋯⋯

3.  好羨慕全母乳媽媽

有時心態上，總會好羨慕可以全母乳餵哺BB嘅媽媽，雖然知道對方都付出唔少努力先可以做到富媽媽，而自己都可以堅持到有母乳畀BB已經算好好，但始終對於要另補奶粉感到耿耿於懷，希望有朝一日，自己都可以做到富媽媽，夠BB食就好喇⋯⋯

Text：Mami Editorial

Photo Source： Shutterstock