帶住BB出去餐廳食都會好狼狽？ 爸媽推介令BB專心坐定定5件法寶

當BB由「一舊雲」嘅狀態變成一見到新奇事物會伸手搶嘅「小馬騮」後，爸爸媽媽帶親BB出街食嘢都會變得好「論盡」，一方面要將BB面前嘅餐具推得遠遠，唔俾BB有機會拎到黎玩而受傷外，另一方面亦要安撫BB因為悶而扭計、哭喊、求抱抱、討食嘅情況⋯⋯可以話爸爸媽媽食一餐飯都有排忙，其實想帶著BB都可以食得自在，不妨參考下其他爸爸媽媽們推介嘅5件法寶：

1.車仔玩具

新奇好玩嘅玩具最能夠吸引BB嘅視線，爸爸媽媽可以帶定啲玩具俾BB玩，如可以推黎推去嘅車仔，BB發現自己可以推得郁車仔會感到非常神奇！另外一啲平時好少俾BB玩嘅玩具都可以成功引起BB嘅興趣！但要留意如果係一啲平時BB喺屋企都唔會點玩嘅玩具就唔好帶喇，千祈唔好諗住反正BB喺屋企唔玩就帶出街「粗用」，因為BB一樣都會冇興趣。

2. 砌圖

大啲識玩砌圖或形狀板嘅BB就可以用呢件法寶喇！通常玩砌圖都需要BB用耐啲時間去諗同砌，爸爸媽媽就可以趁機享受自己嘅餐點，仲可以順便訓練下BB嘅專注力添！

3. 圖書

如果BB開始鍾意模仿其他人，爸爸媽媽不妨帶幾本講用餐嘅圖書俾BB，等BB一路睇書一路觀察爸爸媽媽嘅用餐情況，BB好快就會學到用餐時要坐好喺椅上。

4. 蠟筆同紙

BB唔識握筆寫字，不過當爸爸媽媽示範喺BB面前用筆喺紙上畫公仔後，BB見到紙上充滿唔同圖案後，都會好開心想自己試下跟住去做，然後拎起枝筆玩到不亦樂乎！不過爸爸媽媽要注意唔好用尖頭嘅筆，避免BB玩緊嘅時候會整傷自己呀！

5. 食物剪刀同BB餐具

如果BB係一個小吃貨，已經可以食到大人嘅食物，而覺得所有嘢都不及面前嘅食物咁吸引BB，爸爸媽媽唯有認命帶食物剪力同BB餐具，同BB一齊分享美食啦！

Text：Mami Editorial

Photo Source：Shutterstock, Pinterest