抱住BB坐大髀瀡滑梯容易發生夾斷腳

By race.cheng on 15 Mar 2019

唔少爸媽都會帶小朋友去公園放電，其中瀡滑梯更係小朋友最愛。有時爸媽會抱起小朋友坐喺自己大髀上一齊玩，但其實係好危險！

有台灣媽媽喺社交網站上分享咗自己同小朋友玩瀡滑梯嘅慘痛經歷，事源媽媽抱住小朋友一齊瀡，但中途小朋友嘅腳卡住咗，反屈摺合，而媽媽抱住小朋友仍然向下瀡，結果當滑到地面後小朋友就出現骨折。

醫生指，明白爸媽係玩瀡滑梯時想抱住小朋友，令小朋友有安全感，但由於滑梯又高又長，重力加速度後，小朋友嘅腳若唔小心卡住，就會出現急煞車情況，但由於媽媽抱住未必可以同步，結果就會出現骨折！

其實類似情況有唔少爸爸媽媽都唔小心中招，外國媽媽亦曾經分享自己大意嘅事，指囡囡喺12個月時，就係因為我抱住佢玩瀡滑梯，結果右腳夾喺我腿部同滑梯之間，結果夾斷腳。

媽媽Hearher亦忍痛分享囡囡受傷嘅一刻，看似平相嘅開心相，其實暗藏危機，相中清楚見到囡囡嘅腳向上拗，但由於媽媽抱住繼續向下，所以導致骨折。媽媽指，當時其實已意識到會有意外，所以嘗試用一隻手停止滑下去，同時亦靠向另一邊，希望可以放開她的腳部，但都制止唔到悲劇發生，希望其他父母可以知道事情嘅嚴重性，唔好經歷同樣嘅惡夢，令小朋友承受痛楚。