媽媽係BB專屬翻譯員 最知BB心意嘅莫過於媽媽 媽媽秒懂5句BB話真正意思

BB牙牙學語階段，絕大部份BB話都冇人會聽得明，但係神奇在媽媽都會知道BB每句說話／表情係表達緊咩意思，就好似係BB專屬嘅翻譯員一樣，以下5句BB常講嘅說話配合身體語言，大家又估唔估到呢？

1.「媽媽！」

爸爸一聽到呢句，好多時會即刻同媽媽講：「BB搵你呀！」然而呢句說話背後，喺唔同情況下都有著唔同意思，媽媽會順利解讀為：「我肚餓呀！」、「我要拎呢個！」、「我要去嗰度！」、「我唔要呢樣！」、「我唔舒服！」簡直係萬用句子！

2. 「嘩！」

配合BB雙眼發光、手指向某方嘅表情，BB係想話俾身邊人聽自己發現咗新奇事物，急不及待要同大家分享！或係玩緊嘅得意好玩嘢，開心到忍唔住驚嘆。

3. 「汪汪」

當媽媽教識BB狗係叫「汪汪」，BB就會認知所有四隻腳嘅動物都係叫「汪汪」，例如貓、羊、豬，無論喺書或電視見到咩四腳動物都係同樣叫法。

4. 「mum mum」

對BB黎講，食嘢就係「mum mum」，無論想食米糊、粥、飯、生果、麵包等都係同樣叫法，所以有時BB想食某樣「mum mum」，可能指嘅係麵包，你拎另一種食物畀BB就唔啱喇！要睇埋BB嘅目光同手勢係向著邊。

5. 「⋯⋯」

最令媽媽緊張嘅就係BB安安靜靜唔出聲，十有其九喺度專心玩緊唔知咩嘢，媽媽一定會放心唔落衝去睇BB搞邊科，有時會見到災難現場⋯⋯

Text：Mami Editorial

Photo Source： Shutterstock, Pinterest