點解BB 2至3個月大有時會有驚嚇反應？夜晚無法安然入睡令父母非常憂心

By rachel.lo on 14 Mar 2019

當BB兩至三個月大嘅時候，爸爸媽媽都會發現，即使只有少少聲響，BB好多時都會突然流露出好似好驚嚇嘅表情：雙手向外撐開又快速彎曲，雙眼瞪得大大，好似好驚慌嘅樣。爸爸媽媽好多時都會好太擔心、緊張到周圍搵方法去俾BB「定驚」，但原來呢個係BB正常嘅驚嚇反射動作！

基本上，驚嚇反射動作係每個初生BB與生俱來嘅能力，而喺母嬰健康院嘅例行檢查中，醫生都會測試BB有冇呢個反應，如果冇嘅話，就代表BB嘅神經反射較差。

兩至三個月大嘅BB好多時會因為受到各種程度不一嘅驚嚇而出現呢種反射動作，而驚嚇太頻密嘅話，的確會影響到BB喺夜晚無法好好入眠而哭喊，令爸媽甚為疲倦又擔心。遇到呢啲情況，爸爸媽媽可以嘗試用薄包被包住BB，連BB雙手都包實，令BB感到安全感，可以緩和BB嘅驚嚇感、減少驚嚇反射出現嘅次數，令BB可以瞓得較好，爸媽亦得以休息。