每晚孩子瞓覺睡姿爛到似打功夫 最常使出5招令父母難以招架：求你俾我瞓下⋯⋯

隨著BB長大至1歲以後，好多BB都可以一覺瞓到8個鐘以上，爸媽以為自己終於可以有覺好瞓嘅時候，BB竟然開始一個令父母傻眼嘅舉動：半夜扎醒拎定張被，喊住等爸媽抱去大床！原來，BB已經唔再滿足於只有日頭黐住爸媽，連夜晚瞓覺都要爬上爸媽床要求一齊瞓黎尋求安全感。以為三人瞓同一張床好溫馨？實情係BB嘅睡姿超爛！搞到爸媽每晚都難以入眠，以下5個BB舉動更常常令爸媽叫苦連天：

1. 拍打爸媽臉

氹BB瞓有幾難，相信父母們都非常清楚。每當父母抱BB到大床上，然後自己扮瞓著，希望培養到BB嘅睡意，偏偏BB「不解風情」，起勢咁一巴一巴打落父母嘅臉上⋯⋯希望叫醒爸媽同自己玩，而爸媽要做戲做全套，繼續忍痛扮瞓！

2. 一腳踩要害

BB用手拍打算係好有禮貌，當BB培養緊睡意同半夜頻繁轉身嘅時候，兩隻腳仔總會唔安份咁踢黎踢去，經常一腳踩落父母嘅臉、胸、肚、下體等要害，令父母痛極亦唔可以叫出聲，有經驗嘅父母會練成條件反射，當BB郁動會下意識伸手保護自己身體某部分。

3. 鐵頭功

BB半夜隨時起坐起身又瞓返低、360度旋轉⋯⋯BB個頭隨時重重壓喺父母嘅頭、頸、胸口、肚等地方，令父母產生痛感同窒息感，喺怕整醒BB嘅情況下難以自我脫身，常常要拍醒另一半尋求協助。

4. 瞓咗父母個位

張床本身都已經唔係大，BB瞓瞓下會不停移動身邊，直到爸爸媽媽其中一個跌落床⋯⋯

5. 屁股坐頭

當BB醒咗，而父母繼續瞓嘅時候，唔知點解父母個頭會成日俾BB好「順便」咁當凳坐，有返咁上下重量嘅BB加上包咗一整晚嘅尿片，喺壓迫感同尿臭味嘅雙重攻勢下，爸媽都會即刻清醒哂，起身繼續湊仔生活⋯⋯

Text：Mami Editorial

Photo Source：Pinterest