60年來已捐血逾1100次 用血液救助溶血症BB

媽媽成功懷孕後，BB喺肚入面仍可能會面對好多健康問題。其中新生兒溶血症亦係其中一個會導致流產嘅疾病。澳洲有81歲爺爺James就因血液帶有溶血症抗體，自21歲起就堅持每週捐血，紅十字估計因James血液而獲救嘅BB已超過240萬。

James並唔係天生擁有抗體，係喺一次捐血過程中被醫生發現，血液含有可製針藥嘅抗體，所以James改為捐贈血漿，提煉出無法人工製作嘅針藥對抗新生兒溶血症。

醫生指：「James每一袋血都係珍貴，係成為救命藥物，令受到溶血症影響嘅BB同媽媽得到希望！」但醫院仍然唔確定點解James會有依種罕見血型，認為可能源於James14歲時接受開胸大手術，因當時James接受咗13個人輸血，可能身體因而出現變化。

大手術後，James就決心成為捐血者，得知自己血液能夠幫助人，James更加堅持捐血，60年來已捐血逾1100次，而且愈捐愈密，自1967年開始已煉製出300萬劑針藥，當中受惠者更有James嘅囡囡同外孫！被澳洲政府獲頒澳大利亞勳章，更被稱為「黃金手臂」。James就謙虛指：「依樣可能係我唯一嘅才能，所以我要確保自己身體健康」

根據紀錄，現時澳洲有17%媽媽因溶血症面臨生命風險，成因仍然不明。溶血症症狀係媽媽嘅血液攻擊BB血細胞，引致BB貧血及腦損傷；每年有成千上萬嘅BB因溶血症死亡，而James就成功挽救咗好多生命。

但可惜，由於澳洲法例規定，81歲以上不能捐獻血液，所以James已經喺82歲生日前作最後一次捐血：「希望有更多含有相似抗體嘅人會繼續捐獻，打破我嘅捐血紀錄！」

Text：Mami Editorial
Sources：CNN & Caters