完美詮釋父母眼中嘅子女 日攝影師爸爸以唯美相片紀錄子女成長軌跡

幾乎每個爸爸媽媽自BB出世後，都會化身為孩子專用攝影師，時刻都會拎住手機、緊盯著孩子一舉一動，希望可以紀錄低孩子每一個歷史性時刻，如： 第一次便便、第一次飲奶、第一次笑⋯⋯就算相片拍得幾差都好，每次睇返都會滿滿嘅感動。而日本有一位攝影師爸爸Noriyuki Kajiwara，一如天下所有父母，自女兒出世後就徹底成為女兒控，為女兒拍下一幅幅唯美得仿如宮崎駿風格插畫，游走喺現實同幻境之間，每張相都完美詮釋父母視角中嘅孩子，旋即吸納大量粉絲追捧。

頭頂上大紅蝴蝶結＋騎著掃帚，呢個造型根本就係宮崎駿嘅作品《魔女宅急便》中嘅琪琪嘛！

小草帽＋紅裙子亦係宮崎駿動畫內女角色常見嘅穿搭，加上女兒遠眺嘅姿勢，整幅相嘅意境都非常優美！

喺一片小白花海中望向大海，清新又唯美嘅感覺，活脫脫係前世情人爸爸眼中嘅女兒形象！

喺爸爸眼中，女兒前面仲有漫漫長路要行，唔知爸爸可以牽住女兒嘅手、帶領女兒走到幾遠呢？

白茫茫雪地上，有著溫暖嘅微黃燭光，就好似女兒將爸爸冰冷嘅一面都熔化，永遠令爸爸心頭暖烘烘。

從前只會牽住自己手嘅女兒，有朝一日會甩開爸爸嘅手，獨自搭車出遠門，爸爸們又有心理準備迎接呢一日嗎？

喺好多爸爸眼中，女兒就係世界上最美好嘅風景。

其實除咗女兒外，攝影師爸爸Noriyuki Kajiwara亦有一個小兒子。

兩姊弟喺一片花圃上玩嘅相片非常溫馨呢！

喺黃昏下，可靠嘅大姐姐帶領住小弟弟返回歸家嘅路上，爸爸都非常欣慰有個懂事嘅女兒。

漫天紅葉下嘅姊弟背影，帶著子女出門總係一件賞心樂事！

睇咗咁多相，都只係見到一個爸爸偷拍子女嘅側面同背面，相信大家都好想見下呢對可愛姊弟嘅樣貌！其實呢對小姊弟嘅模樣都相當可愛，連同攝影師爸爸擺出耍帥嘅模樣亦萌倒一眾網友們！

Text：Mami Editorial

圖片授權：NoriyukiKajiwara @IG