結束7年婚姻 呂慧儀與黃文迪宣佈由夫妻變回朋友

有長腳蟹之稱嘅呂慧儀凌晨突然宣佈，於上年已與結婚7年嘅老公黃文迪由夫妻變回朋友。

今年36歲嘅長腳蟹同香港先生黃文迪喺2011年結婚，喺2014年誕下仔仔「小蟹籽」，雙方指分開不涉及任何第3者，大家選擇低調處理，係唔想影響仔仔成長，而且會繼續共同撫養小蟹籽，希望各界唔好作無謂嘅揣測同聯想，所以決定喺社交網站作一次性交代。

36歲嘅長腳蟹同41歲黃文迪結婚後，都被人指有「男尊女卑」嘅形象，但長腳蟹都一直力撐老公，仲話老公買樓買手飾畀自己，係外界唔知，但其後，男方曾公開喺社交網站上傳一張男女牽手相，相中女士塗黑色指甲油，當時長腳蟹更直接留言話，諗極都唔記得自己搽過黑色指甲油，直問當時老公係唔係記錯。而近日，更有傳媒收到讀者爆料，指男方喺巴士同另一女子親熱。

長腳蟹喺上年9月生日上傳過同老公慶生嘅相後，就一直無再上傳同老公或一家3口嘅相，多數都係分享同仔仔嘅合照，每個節日都同仔仔一齊，放晒一切心機落仔仔身上，更指只要同仔仔一齊「我的世界都很美。」、「我陪係，開心就不會累。」

消息公開後，唔少網民都留言支持長腳蟹，仲話鼓勵媽媽同小蟹籽要幸福生活！

Text：Mami Editorial