初生BB好難搞 令媽媽唔再嬲嘅5句BB心底話

每個媽媽湊過初生BB都知呢段時期係最黑暗、最難捱，令不少媽媽頭痕又沮喪。尤其係媽媽產後情緒特別容易起伏，聽到BB不停喊、扭抱就好容易鑽牛角尖、發脾氣。但原來BB都有話兒，喊、要人抱，其實全因BB太愛媽媽。

1.「媽媽不在身邊嗎？請關注一下我吧！」

好多時媽媽湊住BB，無人幫忙的話真係會連廁所都去唔到，因為當你一行開，BB就會不停喊。

其實BB之前一直住喺媽媽肚度，習慣咗一呼一吸都係跟住媽媽。所以好自然地感覺到身邊無咗媽媽就會好不安。

2.「只有媽媽可以給我這種甜美的愛，我不想放開。」

餵過母乳嘅媽媽都知道初生BB可以馬不停蹄咁啜，短則半個鐘，長則斷斷續續兩個鐘都可以。

有時BB含啜姿勢錯咗，或者太過用力可能會令媽媽覺得痛不欲生，仲要連續抱住BB咁長時間，真係會磨滅哂媽媽嘅所有耐性。但其實只係因為BB太享受咁甜蜜嘅愛，呢種愛就只有媽媽先比到。

3.「媽媽的懷抱最溫暖，我知道媽媽還可以抱得起我的時間不長，我要好好珍惜！」

啱啱生完BB嘅媽媽身體好虛弱，加上元氣大傷，都需要好好休息。加上湊住BB體力勞動，難得有屋企人幫手湊、或者有親友黎探望BB，但一轉手BB就喊個不停，要返去媽媽手先唔再喊。

其實BB初黎呢個世界，對於世間嘅一事一物、一聲一響都感到好陌生。而媽媽就係BB心靈上關係最親密嘅人，一切嘅安全感就可以從媽媽身上得到。

4.「這個世界對我來說太陌生了，媽媽抱著我，我才會感到安全，我暫時離不開你。」

BB缺乏安全感，要人抱住又搖又氹，氹咗好耐先瞓得著。每次媽媽以為可以休息下，一放低BB喺床，BB就即刻醒。

而BB其實只係想盡情咁依賴一下媽媽，畢竟佢知道再長大啲，媽媽就可能抱唔起自己。

5.「我的胃承受不了，我不是故意的。」

好多時BB喊，媽媽就以為佢肚餓。當開完奶之後，BB飲咗兩啖又嘔返一大啖出黎。如果係餵奶粉嘅就覺得好浪費金錢；如果係餵母乳嘅媽媽就更加心痛，覺得BB糟蹋哂媽媽嘅心血。

但其實BB胃仔係好細，好快就裝滿，亦好快就消化完，加上一有氣湧上去時係無辦法自控。

其實好多時都係因為BB未識用言語表達感受，最後就只可以放聲大哭去喚起媽媽嘅注意。但換個方面睇，其實都係因為BB愛媽媽啫！

Text : Mami Editorial

Photo : Shutterstock