爸媽抱抱下BB坐低 BB就會喊著掙扎？ 原來邊行邊抱可以滿足BB兩種需求

爸爸媽媽有冇試過，喺抱住BB時想坐低抖下，原本安安靜靜喺懷內嘅BB就會忽然大喊，當爸爸媽媽企起返身行行企企嘅時候，BB就會即刻停止哭喊，繼續安靜待喺爸媽嘅懷內，呢個時候爸媽都會感到BB真係一個會折騰人嘅小傢伙，俾爸爸媽媽想舒服啲都唔得。但點解BB會有咁嘅行為出現呢？躺案係呢種邊行邊抱嘅方法係可以大大增加BB呢兩種需求！

1. 安全感

科學家曾經做過實驗，將一對母子白老鼠關埋一齊，用儀器檢測小老鼠嘅心跳，發現當小老鼠被媽媽叼著走嘅時候，小老鼠嘅心跳速度會急劇下降，而身體活動亦會減少，變得非常乖巧安靜，情況就好似人類媽媽抱著小寶寶一樣。

原來哺乳動物呢種情況係叫做「逃命反應」。當哺乳動物遇到危險時，媽媽都會快速叼起自己嘅BB逃走，而BB唯一能配合媽媽嘅，就係安靜待喺媽媽嘅懷內，唔會亂叫亂郁去阻礙大家逃生，增加存活率。所以，喺演化過程中，BB會認識到媽媽抱著自己走嘅呢個動作係代表住脫離危險，亦即係意味著安全，所以BB會依賴媽媽抱著自己行呢個令人安心嘅舉動。

另一個講法就係，媽媽抱著BB走呢個行動，令BB感覺到自己就好似返到去媽媽子宮時嘅狀態，當BB仲係胎兒嘅時候，BB已經習慣媽媽走路時晃動嘅節奏同擺幅，而呢種感覺亦會特別令BB感到安全感。

2. 新鮮感

當爸爸媽媽抱著BB行嘅時候，環境不斷轉變都會令好奇嘅BB感到無限驚喜，但當爸爸媽媽坐低時，BB就會意識到爸媽唔會移動而令到身邊景物唔會轉變，所以為咗再可以睇到更多新奇嘅事物，BB都會忍唔住掙扎一下作出抗議，要求爸媽繼續移動去滿足自己嘅探索欲望。

BB唔能夠清楚表達自己嘅感受同欲望，所以作為BB最親近嘅爸爸媽媽，只能透過觀察BB嘅反應去理解BB嘅需要，久而久之，就會摸清楚BB喺唔同情況下嘅哭喊係代表啲咩需求，到時就可以因應情況去選擇滿足BB與否。

Text：Mami Editorial

Photo Source： Shutterstock, Pinterest