幼稚園孩子凌晨2點等媽媽接放學 日本紀錄片道出雙職父母無奈

大家對於幼稚園嘅印象係咩呢？ 相信總會離唔開一大班充滿童真嘅小朋友喺陽光下嬉戲，爸爸媽媽會喺早上送小孩出門，下午就會將小孩接返屋企，有正常健康嘅作息時間。但原來喺另一個國度裡，有一間幼稚園嘅小孩需要待喺幼稚園一整日，直到凌晨時份先等到父母將自己接回家，而呢間幼稚園更係位於被人認為烏煙障氣嘅紅燈區內，大家又有咩感覺呢？日本一個好有名嘅紀錄片節目《紀實72小時》，就紀錄咗一間開喺紅燈區、會開放至通宵幼稚園，窺探當地父母嘅非一般育兒生活。

呢間會通宵營業嘅幼稚園坐落於日本福岡嘅一個紅燈區內，會提供日夜全托服務，主要為某啲唔方便喺日間至傍晚接走孩子嘅家長而設。而呢啲家長大多係從事正當職業，如侍應、裝修工人、記者等，只係因為礙於唔正常嘅工作時間而被迫喺凌晨時份接孩子。其實，對於影響到孩子理想嘅作息時間，呢啲家長比任何人都更要心痛、無奈。

呢間幼稚園內嘅孩子年齡由1至6歲都有，共約150個，好多都係黎自單親家庭或無法長時間陪伴孩子嘅雙職父母家庭，而喺日本，並唔興靠老人家去照顧小孩，所以呢啲家庭都係靠深宵幼稚園去托管小朋友，自己先得以去工作賺取生活費去養活一家人。慶幸嘅係，呢間幼稚園嘅收費合理，令到呢班父母都可以負擔到孩子嘅學費同生活費，所以佢哋都非常感激呢間幼稚園願意提供協助。

而呢間幼稚園嘅小朋友，全都擁有天真無邪嘅笑容，對著鏡頭笑得非常燦爛，都係暖心嘅乖孩子。

當中有一位記者媽媽，由於丈夫外派，所以要獨自兼負工作同育兒嘅責任。喺晚上7點嘅時候，仍然同2歲嘅女兒小若葉一齊喺幼稚園內睇書，絲毫無要走嘅念頭。

媽媽表示，女兒正處於Trouble 2（2歲叛逆期），咩都要自己話事，經常同媽媽唱反調：「我唔係小寶寶喇！」

每次媽媽都要同女兒睇下書、玩下滑梯，玩好耐都唔肯走，常常要花近一個鐘先能夠結束消耗戰，帶女兒離開幼稚園。

呢個時候媽媽心身已經感到非常疲憊，提到工作同育兒嘅苦況，終於忍唔住流下眼淚⋯⋯

另一位同丈夫其同經營日料店嘅媽媽，喺打烊後匆匆趕到幼稚園，將熟睡嘅孩子接返屋企。料理店媽媽表示自己無法成為全職媽媽去陪伴孩子，無論幾辛苦都好，都要工作同家庭兩邊走，然而熟睡中嘅孩子無法理解大人左右為難嘅世界。

有一日，孩子一入幼稚園就發燒，媽媽雖然心急如焚，但必須要先上班搵人替工先可以再接孩子走，然而媽媽嘅匆匆離去更令孩子感到被遺棄，喊得撕心裂肺，令媽媽每行一步都忍唔住回頭望，非常痛心嘅一幕⋯⋯

一位喺夜店工作嘅單親媽媽，喺凌晨一點黎到幼稚園，2歲嘅兒子已習慣性醒著等媽媽黎接自己走，孩子甜笑著被媽媽抱喺懷內。

媽媽表示孩子係一次遇人不淑而有，懷孕時更被男方借錢，隨後發現男方身邊原來仲有唔少女友，所以最後決定同男方分開，獨自撫養孩子。單親媽媽不分日夜都要工作，內心同身體都承受極大嘅壓力同煩惱，但亦堅決一定要令孩子幸福。每次送孩子入幼稚園，孩子總會唔捨得媽媽而喊得呼天搶地，每每令媽媽感到非常難過。

開到深夜嘅幼稚園，尤其是位於紅燈區，對於呢種唔係理想中模式嘅類型，難免會受到好多外人質疑嘅聲音同歧視嘅目光，連拍攝呢部紀錄片嘅導演大宮耕一都唔例外，喺拍攝初期都對咁樣嘅幼稚園抱著懷疑態度。

但係喺拍攝過程中，當導演親眼見到幼稚園嘅育兒師盡心盡力去照顧孩子嘅生活、安慰孩子嘅心靈、積極教導孩子、主動給予關愛⋯⋯而每一個孩子都非常乖巧懂事，如喺郊遊日，一個叫小健嘅男孩因為唔小心捏壞媽媽做嘅卡通便當而傷心得抱著膝蓋喊。

等到媽媽黎接孩子時，育兒師將呢件事全都話畀媽媽知，媽媽非常感動孩子係咁珍惜自己整嘅便當。

導演見證到保育員、孩子、父母都充滿愛同溫暖，努力令大家得到安慰，亦終於理解到社會係多元，任何一種特殊嘅存在都係有其需要同意義，畀大家都有希望去生存而不至於走投無路。

Text：Mami Editorial

Photo Source：騰訊視頻