喺媽媽陣痛到分娩時 BB都冇偷懶 一樣好努力令自己出世！

當孕媽媽開始出現陣痛嘅時候，相信都會好緊張但又期待，既害怕經歷十級痛時自己會無法承受，但又非常期待見到十月懷胎嘅BB。每位媽媽們入到產房嘅一刻起，會感到前所未有嘅孤獨同無助感 - 所有生BB嘅痛楚只有自己一人承受，要將BB生出黎亦只有自己一個人出力去完成，而老公、醫生同助產士都只有喺隔離協助自己去完成呢個使命⋯⋯但原來，媽媽並唔係孤軍作戰！媽媽肚內嘅BB喺呢個時候都一樣好努力去出世，陪媽媽一齊完成呢個生產嘅過程！

首先，當媽媽嘅宮頸全開嘅時候，BB知道自己即將出世，都會開始收起下巴、縮起肩膊，然後衡量一下自己個頭究竟可唔可以順利穿過媽媽嘅骨盆。

當發現自己唔能夠通過嘅時候，醒目嘅BB轉第一次身試下！當到達骨盆底部後，BB就會再做第二次轉身，由面向側面轉成面向媽媽嘅背面，然後BB嘅下巴亦開始離開前胸，慢慢仰起頭，努力將後腦從媽媽嘅恥骨中擠出。

呢個時候，醫生同助產士都能夠清楚見到BB個頭仔，亦會叫媽媽唔好太用力，因為如果太快娩出BB個頭，媽媽嘅會陰就會嚴重撕裂，所以要稍稍放鬆。

而BB會將身體旋轉90度，頭仔再次轉返去側面，俾一邊嘅肩膊先出，跟住再慢慢出埋另一邊肩膊。

最後，醫生同助產士就會叫媽媽用力屙BB出黎，將BB整個身體順利娩出。

小小身軀幾經掙扎終於出到世，呼吸到世界上第一啖空氣嘅BB，第一件做嘅事當然係喊啦！好多BB嘅頭仔由於喺產道中受到擠壓而令頭頂變得尖尖、頭兩側有輕微嘅凹陷，呢啲都係BB喺生產過程中努力嘅證明，辛苦程度都唔比媽媽低啊！

所以媽媽們要記著，喺整個懷孕到生產期，都絕對唔係孤軍作戰，因為小小嘅BB都好努力係同媽媽一齊經歷呢一切！

Text：Mami Editorial

Photo Source: Shutterstock, Pinterest