Helen姐唔只係女強人 仲係一個有囝萬事足嘅24孝媽媽

每晚陪住大家食飯嘅處境劇《開心速遞》入面嘅人事部主管Helen姐係一個女強人，既高薪厚職，仲繼承咗百億遺產，名符其實嘅打跛腳唔洗憂，但原來現實中嘅Helen姐恰恰相反，係一個知慳識儉嘅廿四孝媽媽。

47歲藝人姚瑩瑩係新加坡人，喺1991年當選新加坡小姐冠軍，其後參加環球小姐而識咗袁詠儀，後來係袁詠儀引薦佢黎香港發展，毅然隻身來港發展嘅瑩瑩一發展就發展到而家24年。當年仲被大台力棒，係人人皆知嘅五美之一。

喺2011年姚瑩瑩為拍拖8年嘅圈外男友誕下囝囝Evan，不過圈外男友一直未有公開露面，而一直以黎傳媒影到嘅都只係瑩瑩、Evan同工人姐姐嘅畫面。雖然無好典型嘅婚姻生活，但瑩瑩就有住好幸福嘅母子生活。

平時唔單止要應付屋企日常開支、請工人姐姐幫忙照顧囝囝，瑩瑩仲想比最好嘅嘢比囝囝，不但供囝囝讀國際學校，平日仲有為囝囝報讀不同嘅興趣班。亦都因為有咁嘅支出，瑩瑩好刻苦耐勞，一年拍足十套劇，之前仲因爲咁而捱出病，唔單止係頸椎移位，仲有膝蓋受傷等外傷，都仲未計內在嘅影響，瑩瑩成個人水腫哂，比起以前選美嗰時大足幾個size。

即使平日工作忙碌，但一有時間瑩瑩就會陪囝囝，瑩瑩喺社交平台嘅相大多數都係同囝囝嘅合照，一時帶佢去遊山玩水，一時留係屋企玩親子家庭樂等等。就算有工人姐姐，瑩瑩為咗仔仔都樂意事事親力親為。

就算工作幾忙、生活有幾大壓力都好，瑩瑩係囝囝面前永遠都係展露最溫暖嘅笑容，完全可以體現到咩叫有囝萬事足。

24年前一個人嚟香港嘅瑩瑩，父母都留咗喺新加坡，瑩瑩為屋企奔波勞碌多年，直到今年新年終於有時間帶埋囝囝返新加坡探爸爸媽媽。雖然多年黎好辛苦，但見到囝囝Evan咁生性，瑩瑩應該都會覺得一切值得嘅。

Text：Mami Editorial

Photo：姚瑩瑩 @ 微博