兩胎家庭邊種組合嘅家庭最幸福？研究：最佳嘅兄弟姊妹組合原來係呢種！

如果你有兩個孩子，會希望係兄妹、姊弟、兄弟定係姊妹呢？對於好多想有二胎嘅媽媽而言，有一仔一女就係最理想，尤其係兄妹關係，除咗可以同時感受到兒子同女兒嘅大不同，享受截然不同嘅樂趣同相處模式外，有暖哥哥風範嘅大兒子照顧萌萌可愛嘅小女兒，真係想像都已經覺得好美好。不過有研究發現，兩孩家庭中幸福感最高嘅係「姊妹組合」！

曾經有一項研究訪問2116對擁有唔同子女組合嘅父母，請父母根據子女嘅行為，例如容易照顧、包容性同全面嘅行為舉止等為孩子評級。總結出有兩個女兒嘅父母感到孩子更聽話、愛幫助父母做家務，而且姊妹間彼此相處得好融洽，對家庭和睦幸福感亦係最高。

話雖如此，其實唔同嘅兄弟姊妹組合都各有好處！

1.兄妹組合

媽媽們最愛嘅兄妹組合，長兄通常都會較懂事，面對柔弱嘅妹妹，更會展露出保護弱小嘅男子氣慨同責任心。通常有一段年紀差距嘅兄妹關係中，大哥哥嘅身份會驅使著自己照顧妹妹，願意帶着妹妹一齊玩，而妹妹有哥哥嘅寵愛照顧，亦會感到幸福。不過，如果哥哥同妹妹嘅年紀相若，喺年紀小嘅時候可能會發生爭奪玩具、互不相讓嘅情況，但隨著大家年齡漸長，哥哥最後亦會識得禮讓、照顧妹妹。

2. 姊弟組合

女仔天生就會較有母性，會識得照顧人，所以好多姐姐都會對弟弟「照顧有加」，有時喺管教弟弟上，甚至比媽媽仲嚴格！好多姐姐即使長大成家立室後，仍然會操心弟弟嘅事，令媽媽更省心。

3. 兄弟組合

好多爸爸媽媽都會認為男仔較活潑好動，兩胎都係男仔嘅話，容易由細打架打到大，更會令爸爸媽媽每日都煩惱不已。不過當兄弟長大後，都會較重情義，有兩個大男人保護爸爸媽媽，爸爸媽媽都會感到好可靠呢！

4. 姊妹組合

研究中最佳嘅組合，一對姐妹花從小開始會手拉手一齊玩煮飯仔、一起扮靚，而且女仔天生就最會體貼父母、向父母撒嬌。即使嫁出去，心裡都會特別惦記父母，所以有兩個女兒嘅家庭總會特別和睦同幸福。

不過值得注意嘅係，並唔係女兒愈多就愈好。研究結果顯示，2個女兒喺所有項目中得分最高，而4個女兒就係得分最低。研究人員表示：「2個女兒像天使，但女兒越多，麻煩越多，甚至比男孩帶來的麻煩還多。」

Text：Mami Editorial

Photo Source： Pinterest

Source：bounty.com