牙醫診所最年輕病人 英國BB一出世就長前牙

大部分BB 4到7個月大嘅時候就會開始長牙，但英國有位初生BB一出世就有一粒前牙，唔少醫護人員都話未見過！

英國媽媽Bethany喺Avery出世後就發現BB牙齦中長出少少牙，但由於BB太細過，所以未有好好檢查。但到BB 2星期大後，Avery嘅前牙幾乎完全長大，媽媽擔心BB健康出現異狀，又怕餵母乳時會整損，所以帶BB去做檢查。

醫生指，2000個BB中就有一個初生BB會有胎生牙，但形成原因暫時未有確實答案，對BB健康沒太大影響。因為胎生牙容易脫落，擔心BB會意外噎住，而且媽媽餵哺母乳時可能會容易割傷，導致發炎，所以一般會建議剝走胎生牙。

Avery去剝牙時只有4週，成為牙科診所入面最年輕嘅病人，因為胎生牙好鬆，幾乎已經唔連住牙根，所以剝牙時Avery係好乖咁瞓覺，而且無流血。媽媽指：「我一入牙醫診所，其他牙醫都覺係奇聞，都話希望可以從旁觀察，了解更多胎生牙係咩一回事。」

另一種出世就有「牙」嘅情況叫「生馬牙」，馬牙係指BB口內有多個白色硬點，好似牙咁，但其實唔係真正嘅牙，而係皮細胞堆積而成，都係唔會對BB健康造成危害，但需要注意口腔健康，爸媽唔洗用針挑同嘗試擦甩馬牙，因為BB經過吮奶過程後，「馬牙」便會自行剝落。

Text：Mami Editorial

Sources：News.com.au