陳凱琳公開已產子 鄭嘉穎難掩激動

陳凱琳今終公開宣佈已生下BB Rafael，感謝醫護人員悉心照顧外，亦多謝大家關心，但就未有指BB係順產定剖產。

上周五已傳陳凱琳Grace到港安醫院剖產，當時鄭嘉穎就向傳媒表示有好消息會盡快公布，未有承認老婆產子消息，直至今日二人就分別喺社交網站公開BB已出世，Grace就指自己同BB都平安，多謝大家關心；而鄭嘉穎難掩做爸爸嘅激動，留言話：「個個父母都話自己個BB係最得意⋯我終於明啦！」喺相片Rafael有好多頭髮，而且眼仔碌碌，遺傳到爸爸媽媽靚靚基因，期待見到更多BB相呀！

49歲鄭嘉穎去年8月同細過自己22年嘅陳凱琳結婚，當時已有消息指係奉子成婚，但二人都否認，直到11月雙方公佈做爸爸媽媽，但仍未有公開自己懷孕幾多月，當然宜家BB順利健康出世先係最重要喇！

Text：Mami Editorial

Photos：陳凱琳@IG