婚前同婚後有分別 江若琳被老公情人節偉論激親

江若琳同老公蕭潤邦Oscar上年12月拉埋天窗後，今年就一齊過第一個唔同身份嘅情人節，但原來真係往往只係單方面嘅想像，老公對情人節有另一睇法！

江若琳喺社交網站上載咗同老公嘅對話截圖，內容係老公對情人節發表嘅偉論，話覺得情人節根本無咩大不了，每日都一樣愛老婆，覺得情人節係「無意義」、「好低俗」但睇返江若琳嘅留言，老公婚前應該唔係咁講！話：「結婚前同結婚後既分別」、「我係咪要覺得佢好浪漫呀？」仲嬲嬲地叫老公「今晚食自己啦 ！」

有唔少網民就留言話自己已經慣咗老公會咁講，仲笑蕭潤邦「龍門任你擺」，江若琳就話各位男士都可以學下老公，相信會慳唔少！

江若琳同相識十年嘅「好兄弟」Oscar拍拖唔夠一年就宣佈要結婚，上年老公就豪花7位數字舉辦世紀婚禮娶老婆，雖然今年第一次以兩公婆名義過情人節，老公仲話「情人節係無意義」，但係老公蕭潤邦又點會唔錫老婆呢？只係唔想畀情人節嘅形式規範遮⋯⋯

Text：Mami Editorial

Sources：江若琳@IG