難以抗拒嘅可愛魅力 BB 5個超可愛舉動電暈爸爸媽媽

自從有咗BB後，爸爸媽媽都會感到生活變得多姿多采，全因每日都有BB為自己送上無數笑彈！好多時只要靜靜望住BB做以下5個動力，爸爸媽媽就會被逗得笑逐顏開，大家又最鍾意BB邊個動作呢？

1. 大笑

BB嘅笑聲往往係最具有傳染性，一聽到BB笑到卡卡聲，爸爸媽媽都會忍唔住跟住笑埋一份，仲好似著咗魔咁完成唔想停落黎，而不停引BB繼續笑！

2. 嘟嘴

平時見到女生做嘟嘴狀，總會好嫌棄呢種扮可愛嘅舉動；但係換轉係BB嘟起個櫻桃小嘴，就會令爸爸媽媽心花怒放，真係好想一啖啜落去呀！但為BB安全，要努力抑壓住呢股欲望！

3.伸懶腰

想醒又未醒晒嘅BB好多時都會合埋對眼又好肉緊咁伸一個大大嘅懶腰，姿勢要幾撩人有幾撩人，望住BB呢個模樣，爸爸媽媽都會覺得好好笑，一早就有一個好心情！

4.吮腳指

雖然有時會覺得唔太衛生，不過見到BB柔軟度極高咁去捉實自己隻豬腳餘，吮得津津有味嘅樣，核突得黎又好可愛！

5. 模仿

大啲嘅BB好多時會憑藉平時嘅觀察，忽然心血來潮去模仿做某啲動作，常常會令爸爸媽媽驚喜之餘又感到好笑，一時餵公仔食嘢，一時又扮拎柺杖行路⋯⋯令爸媽有表演睇，樂趣滿分！

Text：Mami Editorial