昆凌就係因為周杰倫一句說話 願意再生兒育女

周杰倫近日喺美國拉斯維加斯開演唱會，老婆昆凌更係有去撐場。對於戀愛生活一直都低調分享嘅周杰倫，近幾年開始按捺不住，時不時就喺社交網站放閃，今次仲要喺舞台上向大家介紹：「我的老婆。」

有網民喺社交網站分享周杰倫介紹嘉賓時嘅影片，影片中周杰倫先介紹前F4成員Vanness（吳建豪），接住就提到：「坐在Vanness後面的呢，是一位很漂亮的女生」，仲特別cue攝影師影，鏡頭一拍原來係昆凌，周杰倫就話：「後面呢～我的老婆！」昆凌更係甜到入心，仲大方對住鏡頭揮手笑。

周杰倫高調介紹自己老婆，令到現場都極度興奮，唔少網民仲話被周杰倫宣示主權嘅方式瞬間被閃爆。

周杰倫同昆凌結婚已經5年，由戀愛到結婚生活一直被受關注，開始時周杰倫好少將自己愛情生活公開分享，但自從老婆昆凌產下一仔一女後，周杰倫就時不時都會喺社交網站放閃，更曾經被爆，即使昆凌生下囡囡，仍然向老婆承諾：「一定會先疼老婆，再疼女兒。」昆凌亦話係自己願意為周杰倫再生兒育女嘅原因。

Text：Mami Editorial

Photos：昆凌@IG & 秒拍