BB每樣嘢都值得紀念 每個媽媽總會珍藏BB嘅5樣事物

媽媽除咗想親眼見證BB每一個第一次之外，對於BB每一樣歷史性嘅事物，媽媽都會想好好保存，等將來BB長大，可以如數家珍向BB逐一介紹小時屬於BB嘅一切。以下5樣物件，媽媽們仲有冇保留住呢？

1.超聲波相／影片

懷孕時初次見BB嘅感動，雖然相／影片中嘅BB當時只係一粒豆或一棚骨，連媽媽自己都唔係好睇得出邊度係頭同身，但就係媽媽眼中最可愛嘅存在！每次見到呢啲相，都會好懷念懷孕時嘅感覺，見到當時嘅胎兒變成而家精靈活潑嘅BB，總感到好不可思議！

2. 臍帶

將初生BB帶返屋企後，望住呢條曾將媽媽同BB緊緊連繫住嘅臍帶竟然會感到好害怕，總係擔心將BB嘅臍帶位清潔得唔乾淨，或唔小心將臍帶過早整甩而傷害到BB，好唔容易等到臍帶脫落，見到臍帶已經變得又乾又醜，媽媽都唔捨得扔咗去。

3. 胎髮

初生BB嘅頭髮非常柔軟又好好摸，對於熱愛聞BB頭仔香味嘅媽媽點都會留一小撮BB嘅頭髮，用嚟做胎毛筆，既美觀又易保存。

4. 母乳

滴滴皆辛苦嘅母乳係媽媽送畀BB最美好嘅禮物，亦係紀錄媽媽頭兩年辛酸日子嘅最好印記，現今市面上有好多將母乳變成首飾，方便媽媽珍藏。令媽媽每次見返自己嘅母乳，都會諗起同BB親密嘅時光，對於自己可以堅持餵母乳而感到自豪。

5. 第一頂帽仔

初生BB喺醫院出世後都會即刻被戴上帽仔保暖用，呢頂帽仔亦係BB人生中第一頂獲贈嘅帽仔，雖然唔算得上好靚，但就非常有紀念價值！每次見到呢頂帽仔，都會驚訝當時BB個頭仔原來咁細！

Text：Mami Editorial

Photo Source： Shutterstock, Pinterest