34歲C君求婚成功 作求婚歌曲但唱到口震震

組合農夫成員C君求婚成功！早喺上年11月農夫演唱會時，34歲嘅C君已公開話會迎娶DJ女友黃天頤，今日就喺社交網站宣佈求婚成功，而未婚妻就感動話一個「愛」字已經唔可以代表晒對未婚夫嘅愛意！

C君同有港台之花之稱嘅黃天頤拍拖3年，成功拉埋天窗。C君係社交網站指，自己年紀漸大，身邊朋友亦一個一個結婚，今日終於輪到自己，感謝女友答應「年紀漸長，很多朋友都有「she says yes」的po文，今日，到我了，she said yes。謝謝，新年快樂。」仲幸福hashtag#共你熱戀可抵擋冰天雪地
#全世界講一次恭喜。

雖然C君低調只貼出同未婚妻手拖手嘅相，但女友就另一邊公開C君求婚過程，原來C君都拎出殺手鐧「唱歌」求婚，仲為求婚親身作曲，但可能真係太緊張，聽聞女友聽唔係好到C君唱咩，但就知首歌叫「無得比」，話：「雖然我完全聽唔到求婚主題曲「無得比」，但睇到你口震震同我講很久前你已經覺得呢段關係可以圓滿，呢個畫面先係真正嘅無得比。」仲幸福話「我們其實相識了很久，同笑的時刻有很多，同哭還好像是頭一次，幸好都是快樂窩心的眼淚。
一句願意，以後同哭同笑。」

C君依段感情算係最穩定，事關C君姻緣一直馬馬，曾經被前女友悔婚，有傳當時C君已一心一意同女友組織家庭，但被指女方因C君患有地中海貧血病為由提出分手，婚事被告吹，令C君心碎，拍檔陸永都話C君成日有爛桃花，但事今就證明玲玲無講錯：「C君好男人，過幾年就結婚」。

Text：Mami Editorial
Photos：tinyeewong@IG