親朋戚友互相關心 每到新年必問10個問題

倒數新年嘅就快到尾聲，好快就會見到久別重逢嘅親戚們，咁耐冇見肯定會相當興奮同雀躍，想好好「關心」一下大家嘅近況。以下呢幾條問題幾乎每年見面都會被「關心」一次，大家又準備好點應付未呢？

1. 幾時生多個？

幾乎係大部分父母最怕親戚會問嘅問題之首，無論你係新婚定係坐緊月都好，總會有一個親戚問你幾時生多個，真係佢仲心急過你！唔好話有一個BB就夠晒數嘅父母會唔想答，就算有想計劃生多個BB嘅父母坦白答想過幾年之後，心急親戚都會繼續追問：「下？咁耐？有仔襯嫩生好喎！遲下啲細路玩唔埋㗎喇！」

2.你/老公做緊咩職位？

親戚們都會好想了解你同老公做緊咩職位，暗暗盤算大概會有幾多人工，有時甚至會追問工作性致、工時，好似佢哋想見呢份工咁，問完一大輪會評論：「你份工又幾好做喎！不如介紹埋XX個仔入去吖！」或「咁辛苦點解唔轉工呀？」。

3.你/老公人工幾多？

有啲親戚直情會好直接開口問你同老公人工有幾多，夠唔夠食同住等等⋯⋯有時當住一大班人面前問，個個都洗耳恭聽，都咪話唔尷尬！

4. 今年加咗幾多人工？

一班親戚聚頭，話題總會涉及錢，有啲親戚會藉著大家聚堆一齊，順便了解下各行各業嘅加薪情況，然後比較一番。

5. 幾時買樓？

衣食住行樣樣貴，最貴嘅莫過於係樓價，香港樓價冠絕全球人所共知，普通打工仔要儲錢買樓都要時間。問人幾時買樓，講到好似買棵菜咁易，實情係當儲到呢刻首期嘅時候，樓價都已經唔知升咗幾多倍。

6. 你畀幾多家用父母？

每個月除咗供養子女外，當然都會畀家用老人家聊表心意，但金額幾多真係睇家庭收入同支出狀況而定，好難有既定嘅標準，畢竟每人嘅人工同仔女數目都唔同！但有啲親戚就非常好奇其他人畀幾多家用，以此比較自己嘅「收入」或「支出」。

7.小朋友讀緊邊間學校？

只要小朋友開始返學讀書，就會有親戚問讀緊邊間呀？然後就會同你講呢間學校校風點呀、師資點呀⋯⋯再同你講自己小朋友又讀緊咩學校，兜一大個圈講自己小朋友間學校幾好。

8 小朋友考第幾名？

就算唔同學校，好多親戚都會好想比較一下小朋友嘅學業成續，順勢顯示自己小朋友叻啲。其實間間學校嘅準則都唔同，小朋友聰明係值得開心嘅事，但就冇必要不停同其他人比較。

9. 有冇幫小朋友報某某課程？

而家香港嘅小朋友總會有至少一項技能傍身，有啲親戚好鍾意叫自己小朋友即場才藝表演唱歌或跳舞，甚至會問其他爸爸媽媽有冇報呢個、嗰個課程，唔講仲以為係課程推銷員！其實報興趣班畀小朋友學多啲嘢嘅出發點係好，但最緊要係小朋友本身有興趣。

10. 點解小朋友咁肥／瘦？

呢個世界燕瘦環肥，咩身型嘅人都會有，遺傳都係其中一樣影響身形嘅因素，不過最緊要都係身體健康！有啲親戚見到小朋友瘦，就會質疑係咪媽媽冇餵飽小朋友、或唔識教小朋友而偏食； 亦有啲親戚見小朋友肥嘟嘟，就會笑佢係肥仔／肥妹，令小朋友唔開心。

Text: Mami Editorial