同BB一齊過嘅第一個新年 當媽以後過新年嘅5個大不同

臨近新年，相信各位媽媽都開始忙碌起黎，除咗每日都要抽時間整理屋企、大掃除外，仲要為家人添置新衫、辦年貨、佈置屋企、包利是⋯⋯有時默默做呢啲事嘅時候，都會諗起以前做女嗰陣，輕輕鬆鬆放假喺屋企hea，收埋收埋唔少利是，個腦只需要諗啲利是錢點洗就夠，同而家相比，可以話係截然不同嘅生活模式！

1. 過年買新衫

以前只需要諗過年買咩新衫畀自己就夠；而家一過年就會諗定買新衫畀BB先，甚至唔記得買新衫畀自己。

2. 大掃除

以前最多年廿八幫手大掃除，做少少簡單嘅清潔工作（只整理自己嘅物件）； 而家要清潔、收拾一屋嘅家電、雜物，仲有自己、老公同BB嘅物品⋯⋯而家每日嘅清潔工作幾乎相當於以前一年嘅清潔量。

3. 食年飯

以前乖乖坐喺電視前等媽媽煮好去食就得，而家除咗要自己落手煮，仲要餵飽BB先到自己可以食。

4. 慶祝娛樂

以前過年想打幾圈麻雀，玩到幾夜都得；而家要隨時去安撫哭喊中嘅BB、餵奶、掃風、哄瞓覺、收拾混亂嘅屋企，然後睇一陣手機，自己都瞓覺算。

5. 派利是

以前好自豪自己係未婚人士，隨時坐喺屋企等收利是，過完年清算自己收到幾多錢，感覺賺咗好開心；而家要將自己嘅血汗錢派出去，過完年清算自己派咗幾多錢，雖然自己已經冇得賺，但望到BB收到唔少利是，都開心大家都BB咁好。

Text: Mami Editorial