執子之手與子偕老 兩夫婦手牽手同分鐘離世

喺現今社會能夠同另一半白頭到老可能已經係難能可貴。澳洲有一對老夫婦，同偕白手70年，最後更同年同月同日手牽手一齊喺病床上離世，佢嘅囡囡Amanda就喺媒體上撰文，講述爸爸媽媽依個浪漫嘅愛情故事。

92歲嘅Francis同90歲老婆Norma原定同家人一齊慶祝白金婚紀念日，但可惜係紀念日前一個月，兩人身體狀況開始變差，最後需要送到加護病房，當時護士安排兩人共用一間房間，更將床鋪推到大家附近，方便Francis同老婆一齊。

但可惜，Amanda指，媽媽呼吸開始出現異常，爸爸情況亦不穩定，喺護士醫生檢查後發現，二人已經安祥離世。但由於死亡時間相距太短，就連醫生都無法判斷係邊位先離去，所以雙方嘅死亡時間都係一樣，而當時Francis同Norma係隔住兩床之間手拖手一齊離世。

Amanda話，爸爸媽媽雙雙離世係一件難以相信嘅事。早喺3年前，媽媽就被醫生診斷會喺聖誕期間離世，但媽媽一直堅持，而當時媽媽嘅腦退化症問題已經好嚴重，甚至失去自理同說話能力，能夠講到唯一嘅說話就係「My Husband (我嘅老公）」。

Francis喺老婆身體變差時不離不棄，囡囡更形容為「簡直係攞條命去照顧媽媽」，憶述指，爸爸係每日風雨不改咁去療養院陪媽媽食飯，更會手拖手一齊睇電視，有時媽媽會依偎喺爸爸嘅膊頭入睡。Francis講過：「有Norma嘅地方就係家。」

但不幸去年Francis唔小心跌親導致輕微中風，連自己身體都捱壞，Amanda指「當時爸爸唔肯食飯，媽媽就唔食飯，爸爸唔飲水，媽媽亦都唔飲，雙方好似鬥氣，做咩都要一齊，但我每次探爸爸媽媽時都發現，媽媽喺旁邊永遠都係望住爸爸笑」

雖然面對爸媽離世，但Amanda仍然覺得自己係幸運嘅囡囡：「我一家人可能曾經缺錢，但從來不缺愛。」爸爸媽媽嘅關係令Amanda知道「生活中唯一重要嘅事情係家庭，朋友，愛情，忠誠同正直。其他事都無所謂。」

Francis同Norma除咗有Amanda依位囡囡外，仲有兩個囝囝兒子同5個孫兒，但其中一個囝囝係23歲時意外離世，當時Francis亦係旁邊支持Norma，給予一家人愛。Amanda表示︰「我要感謝主，畀爸媽最完美嘅辭世，正如我喺悼辭中所講，佢地擁有最浪漫嘅死亡。」

Text：Mami Editorial

Sources：Dailmail