BB瞓覺舉高雙手原來係有原因 真相令媽媽們覺得好萌呢！

爸爸媽媽有冇發現，BB瞓覺嘅時候，雙手總喺放耳邊，好似投降姿勢一樣將手高高舉起，非常可愛！但究竟點解BB咁鍾意呢個瞓覺姿勢呢？

原來係同BB喺媽媽肚內嘅姿勢有關，因為BB喺母體嘅時候都係捲曲著身體，將小手捲曲放喺胸前，出世之後都會習慣用呢種姿勢瞓覺，但BB仰瞓時無法將手捲曲喺胸前，所以就會垂跌到床上，形成一個手往上舉嘅姿勢。

而BB呢個高舉手嘅瞓覺姿勢，喺中醫角度認為係代表BB陽氣充足旺盛、生命力強，身體好健康！因為BB嘅兩隻小手向上舉就好似兩片嫩葉一樣， 諗到呢個畫面媽媽們係咪覺得好可愛呢？

不過，有爸爸媽媽或會擔心BB瞓覺時舉高雙手會容易凍親，而想去改變佢哋嘅睡姿。其實即使爸爸媽媽刻意改變BB嘅姿勢，好多時將BB嘅手放低幾秒後，BB又會將手舉高，仲有機會打斷BB嘅睡眠令BB唔高興而哭喊，所以爸媽實在冇必要刻意調整BB嘅睡姿，而BB呢種睡姿亦會隨著長大後而漸漸消失，爸爸媽媽唔需要過於操心！

如果爸爸媽媽擔心BB會凍親嘅話，不妨為BB著多一件長袖衫或包上包被，確保BB溫暖。

Text：Mami Editorial