做父母睇到頭都大 市面上林林總總嘅奶樽應該點揀好?

做父母睇到頭都大 市面上林林總總嘅奶樽應該點揀好?

靚媽鬆一鬆媽媽日常須知
By Mamidaily on 24 Jan 2019

即將迎接初生BB嘅準父母,對於選購嬰兒用品總會小心翼翼、非常緊張。不過,即使已經做足功課,一踩入店鋪內睇到林林總總、各大牌子嘅同類嬰兒用品總會出現選擇困難症,尤其係要揀BB每日都要放入口內嘅奶樽,又膠又玻璃、有窄又有寬,有啲仲標榜母乳實感、防脹氣等等,真係睇到父母頭都大埋!究竟揀奶樽有咩需要考慮? 睇下以下呢5個Tips啦!

shutterstock_137466206

1.留意奶樽物料

如果係買膠奶樽,要注意絕對唔可以買PC奶樽,因為加熱時會釋放雙酚A(BPA)等致癌物質,曾有研究指食用微量BPA已經可能影響荷爾蒙分泌同生殖系統,不宜畀BB用。反而可以選擇以下物料製成嘅奶樽:PP、PES 、PPSU、矽膠。

PP係透光度同耐熱度最低嘅一種,顏色呈乳白色,耐熱度只有120度,高溫消毒容易變形;至於PES同PPSU膠,則可以承受180度嘅高溫,呢啲奶樽平均壽命只有6個月,因長期刷洗容易令膠面出現刮痕,容易積藏細菌,爸爸媽媽應定期為BB更換奶樽。另外,矽膠奶樽嘅壽命可以長達幾年,耐熱度高達400度,不過質地較易黐塵,大家可按需要選購。

shutterstock_491466271

而玻璃奶樽使用壽命長,容易清洗、唔易產生刮痕同釋出化學物質,非常安全!但就比較重同易碎,如果要畀BB自己拎住奶樽飲就會有危險。而玻璃奶樽嘅邊緣會黐住母乳抗體,餵母乳嘅媽媽最好就唔好用玻璃奶樽。

2. 防脹氣程度

如果BB飲奶嘅時候,將空氣都飲埋落去,唔單止父母要掃風嘅時間更長,亦有機會造成BB腸紋痛同脹氣而唔舒服。有啲奶樽嗁奶嘴頭會有排氣孔,減少BB飲奶時吸入空氣量,冇咁易飲風落肚。

3. 出奶情況

正常奶樽個孔出奶係係一滴一滴咁出,如果出奶太快好易令BB飲唔切而濁親; 太慢就令BB吮得較辛苦而冇耐性飲奶。

shutterstock_440263312

4. 奶嘴頭形狀同尺寸

有啲母乳媽媽會埋身餵BB,有啲情況下亦會用樽餵,為免BB出現乳頭混淆難,可選奶嘴頭模擬媽媽乳頭設計嘅奶樽; 而隨著BB長大,奶嘴頭嘅尺寸都需要換大,避免BB因奶嘴頭太細,難而吸吮。

5. 樽身尺寸

可根據BB飲奶量同便攜程度而決定要買高身定矮身嘅樽;如BB已經長大至可以自行手握奶樽, 爸媽亦要考慮奶樽嘅寬度係咪令BB可以握得穩;另外亦要注意有啲奶樽嘅口徑較窄,倒入奶粉嘅時候會唔會容易倒瀉等情況。

shutterstock_1018910320

Text:Mami Editorial

 

Follow Instagram: MamiDaily


Share to Facebook