陳柏宇視女為命根 悉心為囡囡安排百日宴

視囡囡為命根嘅陳柏宇同老婆Leanne為囡囡Abigail設百日宴，但因為工作關係所以延遲咗舉行。陳柏宇為彌補唔可以同囡囡正日慶祝，同Leanne悉心安排百日宴，仲搞笑扮魔術師助手氹來賓開心。

今次百日宴可算係大搞，場地設計以獨角獸為主，仲訂製一個幾層高蛋糕同夢幻霓虹燈，陳柏宇仲諗定要將霓虹燈放入囡囡自己嘅房。

有朋友笑指，陳柏宇搞到好似自己嫁女咁，抱住囡囡逐張枱多謝同影相，好在囡囡好配合，雖然到平時瞓覺時間，都戰勝睡魔，可能知道係自己「大喜日子」所以都提起精神任賓客影相！爸爸同媽媽都大讚囡囡好乖，慶祝完會畀囡囡好好休息！

陳柏宇絕對唔係要囡囡自己應酬賓客，孖住老婆悉心安排咗表演環節，請嚟魔術師表演，自己就化身魔術師助手，任對方擺，成班來賓都超開心。而且陳柏宇兩公婆考慮到會有好多BB，所以特地安排遊戲空間，畀小朋友玩到盡！

陳柏宇至囡囡上年9月出世後，時不時就喺社交網站無止境分享湊女故事，更話真係唔想返工，要每秒對住囡囡，仲肯定自己係霸道爸爸，要痴實囡囡，真係24孝爸爸呀！

Text：Mami Editorial

Photos：Leanne@IG