早產13週 父母堅持幫BB接受治療
早產BB喺健康上或會比其他足月BB遇上更多難題,而且唔少BB會不敵病魔夭折。但英國有位BB就成功戰勝命運,生存到現今,更同一般小朋友一樣健健康康返學!
Mollie Perrin喺媽媽Stephanie肚入面因為罹患「胎兒宮內發育遲緩症」,即臍帶無法正常吸收營養,導致無法如期發育,所以比預定時間早咗13週出世,當時體重只有1磅1盎司,手臂可以穿過爸爸媽媽嘅結婚戒指,而醫生亦斷定Mollie只可以生存3週。
爸爸媽媽當時無放棄過Mollie ,堅持幫Mollie進行治療,而Mollie體重亦不斷增加,情況樂觀。而Mollie出世4個月後,雖然只有8磅,但可以健康返到屋企!
至今Mollie已經3歲,佢同一般小朋友一樣開始上幼稚園,媽媽Stephanie指:「Mollie從出世開始,為咗生命已經好努力,係一個小小鬥士!宜家見到囡囡宜家咁獨立同健康,真係好難相信佢曾經有過一個好艱難嘅經歷。」見到Mollie宜家同普通小朋友一樣健康快樂,真係好幸福,亦要多謝當初爸爸媽媽無放棄過Mollie。
Text:Mami Editorial