BB一唔如意就出手打人？ 了解BB打人嘅4個常見原因

好多爸爸媽媽會反映，BB自一歲起，脾氣變得暴燥起黎，一唔滿意或順心就會出手打人，常常令父母忍唔住責罵BB，或打BB小手以示懲戒。究竟點解BB郁啲就打人？其實同以下4個原因都有關：

1.表達需求

一歲嘅BB開始學牙牙學語，好多嘢都聽得明，但好多嘢都唔識講，當好迫切想要表達自己嘅諗法，但又無法講出口，就會令BB感到好焦急同暴燥，於是就會用打人來宣洩自己嘅不滿情緒。

2.開始形成「自我」
BB開始出現「自我意識」，會想郁手撥開唔想要嘅嘢，呢個亦係BB用自己唯一知道嘅方法去解決問題，呢個係好正常嘅表現，說明BB開始慢慢形成思維。

3.想大人注意自己
天生較急躁嘅BB，原意可能只係想要大人注意自己，但如果大人對於BB嘅肢體語言表達敏感度較低，BB就會出手打大人，因為只有咁做，大人先會將注意力放到BB身上。

4.模仿大人
有啲BB天生愛模仿，只要見過大人出手打人嘅行為，或電視、影片中出現過打人嘅情節，BB就會照學起黎。如果發現BB開心打人，唔開心都打人，有機會係因為BB嘅小腦袋裡面充斥著呢啲情景。但如果爸爸媽媽常常體罰BB， 或見到爸爸媽媽嬲就打人，BB都會喺自己唔開心嘅時候打人。

Text：Mami Editorial