女人何苦為難女人？ 7個觀念令婆媳關係變得更好

自古以來，婆媳關係好多時都會被形容為水火不容嘅地步，甚至日本曾做調查去研究婆媳最理想嘅距離，有新抱直言最想同奶奶相隔1萬公里！但理想同現實終歸係兩回事，好多家庭都會基於各種原因而令到婆媳同住一家，唔好話由陌生人變親人嘅婆媳間中會有衝突，就算係血濃於水嘅家人都總會有爭拗嘅時候，想改善婆媳關係，最重要嘅係大家都應該抱著以下7種觀念：

1. 尊重彼此

大家始終係來自唔同嘅家庭背景，只係因為兒子／老公而成為一家人，即使名義上係親人，但大家心知肚明只係冇咩特別感覺嘅陌生人。兒子／老公會因為愛而諒解、包容你，但新抱／奶奶就係完全冇愛嘅情況下去同對方朝夕相處，所以喺日常生活上嘅大小事，都應該尊重對方嘅諗法，唔好覺得自己喺原生家庭係咁做，到而家一齊住都完全堅持自己原有嘅生活，而絲毫唔肯作出遷就。只要你願意先試著尊重對方嘅想法，對方先會開始跟著尊重妳。

2. 唔好將奶奶當媽媽

即使叫奶奶做媽，但始終要明白，奶奶永遠唔係媽媽。對著媽媽，可以間中撒嬌、任性、發脾氣，無論點激嬲媽媽都好，媽媽總會原諒自己、疼愛自己。但奶奶就唔同，唔好期待奶奶會當自己係親生女一樣咁包容，亦永遠好難做到呢一點。所以當大家情緒唔好嘅時候，千祈唔好亂發脾氣； 見到對方有做得唔好嘅地方，唔好當佢係媽媽／女兒一樣呼喝，只能夠加倍嘅包容同忍耐。

3. 分擔家務

BB出世後，婆媳同住嘅情況，好多時係老人家負責湊BB同打理屋企嘅一切，而兒子同新抱就外出返工。好多時，兒子同新抱無形中會要求奶奶湊好BB，但又唔放心奶奶湊BB用嘅方法，面對兒子同新抱嘅質疑、湊BB嘅體力勞動同BB間中發生嘅碰跌意外，都會令奶奶感到好大壓力，覺得湊得好冇人讚，湊得唔好遭人嫌。作為新抱，既然湊BB工作大部分由奶奶分擔，放工後亦應同老公一齊分擔家務，雖然廚房「容納唔到兩個女人」，但亦可以幫手變衫、摺衫、洗碗，奶奶亦會因為你嘅懂事而覺得窩心！

4. 少講對方嘅閒話

或者好多時會因為小誤會而鬧不快，但要謹記千祈唔好隨意講對方嘅閒話，因為呢啲說話總會無意中又流傳到對方嘅耳中。無論作為奶奶定新抱，都應該有足夠嘅年紀去學習包容。將大事化小，小事化無，先係令家庭和睦嘅持家之道。

5. 避免同對方正面衝突

無論因為咩事發生爭執都好，都需要避免正面衝突，以免將場面鬧到好僵。如果只係小事，大可以一笑之置；若然係大事，亦應透過兒子／老公呢個「磨心」把口向對方提出。

6. 偶爾關心對方

即使唔係愛人、好友，作為同住嘅家人，見面同相處時間亦唔短，有時簡單一句關心問候，足以令對方對自己嘅好感度增加，如見對方唔舒服，可以問候一下對方，分擔對方嘅工作；或閒時一齊飲茶、出席家庭聚會，亦係促進感情嘅好方法。

7. 時刻抱著感激嘅心

大家同一屋簷下，好多時唔係你幫我做家務、就係我幫你湊BB，太多太多嘅幫助不能盡錄，但要明白到好多嘢都唔係必然要幫你做，所以應時刻對對方抱持感激嘅心態。而唔係嫌棄對方做得冇自己咁好、埋怨對方唔幫自己做呢樣嗰樣。

有時婆媳關係比愛情、友情更難處理得好，但唔好因為咁而唔改善或重視，有時亦應反省一下係咪自己有做得唔夠好嘅地方，千祈唔好一味覺得只係對方有問題。女人，何苦為難女人呢？

Text: Mami Editorial