BB要墊高個頭先瞓得舒服？ 為BB選購枕頭嘅5個注意事項

1歲以下嘅BB唔需要用到枕頭，但當BB年滿1歲又出現以下嘅表現嘅時候，爸爸媽媽就係時候要為BB揀一個合適嘅枕頭，令BB瞓得舒服啲喇！

BB需要用枕頭嘅表現：

• BB主動表現將頭挨喺軟綿綿嘅毛公仔／被上瞓覺。
• 鍾意枕住爸媽身體任何一部分瞓覺。
• 會瞓喺父母嘅枕頭上。
• 冇嘢墊住個頭瞓會覺得唔舒服而不停轉換姿勢。

為BB選購枕頭嘅注意事項：

1. 枕頭高度唔超過4cm

BB嘅頸曲彎度起碼要到4歲先會明顯出現，所以喺4歲之前嘅嬰幼兒只可以瞓好矮嘅枕頭，以免對頸椎造成不必要嘅壓力。所以爸媽係選購枕頭嘅時候，應選擇高度少於4cm；而BB瞓上去嘅時候，枕高約為1cm嘅枕頭。

2. 軟硬度適中

太軟嘅枕頭容易下陷令BB出現窒息危機，而太硬嘅枕頭容易令頸部肌肉疲勞，甚至影響發育，所以爸媽要留意去揀一個軟硬度適中嘅枕頭：用手按一下枕頭中間，如果枕頭好快就恢復原形，咁軟硬度就係適中。相反如果按落去彈唔返上黎就表示枕頭太軟；如果按落去要好耐先恢復原狀，就表示枕頭太硬。

3.透氣性好

寶寶新陳代謝旺盛，好多時汗液、口水會浸濕枕頭，所以如果枕頭透氣性差嘅話，容易令枕頭滋生霉菌細菌，散發一陣酸臭味，容易令BB出現過敏或皮膚病。

4.防蟎抗菌

枕頭亦係滋生蟎蟲嘅重災區，蟎蟲會機會導致BB生濕疹，同引起哮喘等過敏毛病，所以如果枕頭有做防敏處理嘅話，畀BB用會更安心。爸爸媽媽亦需要定期為BB清洗枕袋同晾曬。

值得注意嘅係，即使BB已滿1歲，但如果喺冇墊任何嘢嘅情況下，都瞓得舒服嘅話，其實枕頭對BB黎講並唔係必需品，所以各位爸爸媽媽應根據返自己BB嘅需要而決定畀唔畀BB用枕頭。

Text：Mami Editorial