張頴康恩愛放閃 誓言再揀都要麥雅緻做老婆

娛樂圈「愛妻號」張頴康襯住同老婆麥雅緻Angie相愛11年，喺社交網站表達愛意，憶述同老婆一齊做過嘅「第一次」，更誓言再揀都要麥雅緻做老婆，簡直羨煞旁人。

37歲張頴康喺電視台一直被指「紅角色不紅人」，16年開始得到觀眾支持，喺馬來西亞奪得飛躍進步男藝員獎，坦言多年全靠老婆支持先可以走到今日。

張頴康十分珍惜老婆，記得每個與老婆之間嘅重要記憶，今次發佈多張同老婆以前拍拖嘅相，並配文：「2008年1月4日，我哋第一次通電話，睇戲，約會！假設12年前，我哋由小學一年級開始相識，拍拖直到今日，我哋就中學畢業喇！如果俾我再揀多次，我一樣會決定喺四年後大學畢業即刻娶你做我老婆！我愛你！」帖文一出，立即令好多網民留言話好羨慕！

張頴康2012年同麥雅緻結婚，14年就生咗大囡，17年再接再厲生埋仔仔，湊夠一個「好」字。麥雅緻就多咗喺屋企照顧小朋友，老公張頴康為支持老婆，都會時不時製造兩人拍拖時間，每個重要日子都會記得，有次結婚週年就同老婆去拍拖，仲係社交網站分享：「六年前嘅今日，有個女仔奮不顧身，不顧後果咁嫁咗俾我！今日，因為全日都要開工，所以噚晚兩個偷走出去睇場戲、食餐飯、拍吓拖！我同我老婆講，第時我要同你慶祝60週年結婚紀念日，我老婆話，都唔知我哋有冇咁長命喇，我心諗，冇錯，我真係唔知有冇呢一日！不過，我深信，只要有呢個信念，往後嘅日子，我哋一定唔會浪費相處嘅時光！老婆，多謝你俾咗個屬於我哋嘅家，我愛你！期待60週年同你用假牙食飯慶祝！」

老婆麥雅緻絕對係張頴康一生中不可缺少嘅人，張頴康來自單親家庭，相比麥雅緻，家境又好，學歷又高，但Angie從來無嫌棄張頴康。而張頴康亦懂得疼愛老婆。兩人關係從來都唔係只講緣份，另一半懂得付出，另一半就要懂得珍惜，大家亦會繼續為一家四口努力，製造更多美好回憶。

Text：Mami Editorial

Photos：張頴康@IG