夫妻相處接近半世 最緊要多啲一齊玩

情人成為夫妻後，接近有半世時間要一齊生活，相處時，少不免會出現問題，但當初選擇步入教堂，就絕不可能因為一啲問題就分開，大家都會為關係努力，究竟點先可以令夫妻關係更長久呢？

美國丹佛大學婚姻與家庭研究中心發現，能夠一齊玩嘅伴侶，婚姻關係最牢固。研究中心進行咗長達15年嘅研究，對306對夫妻進行跟蹤記錄，其中包括跟蹤佢哋每日一齊嘅時間、共同嘅興趣愛好、吵架頻率、婚姻狀況等。結果發現，玩樂同婚姻幸福之間關係相當密切，若果夫妻一齊玩嘅時間越多，婚姻越幸福。

研究亦發現，經常一齊玩嘅夫妻大腦中嘅催產素含量都好高，依種激素被稱為「幸福激素」，有助緩解緊張情緒、降低恐懼感，可以令人帶嚟安全感同持久嘅快樂感。

另一半係唔係自己嘅玩樂伴侶，原來對男性嚟講相當重要。專家發現，當男人將自己嘅另一半當成「最好朋友」時，未來5年發生離婚嘅可能性非常低。但如果男性認為老婆只係照顧家庭嘅女性伴侶時，未來5年婚姻出現危機嘅可能性高達50%。

但點樣先可以做到成日一齊玩嘅夫妻呢？

1.一齊接觸新事物

未做夫妻前大家可能都會為去邊拍拖煩惱，幾乎每逢過時過節都會諗下究竟又咩特別事情要做？所以感情可以一直保鮮。但結婚後，大家可能只為屋企事情擔憂，關係就會較之前無情趣，所以要做一齊玩樂嘅夫妻，就要多啲一齊開拓同探索新領域，例如：去旅行、一齊學煮嘢（學習新技能），甚至認識新朋友，都可以幫助大家成為一對會一齊玩樂嘅夫妻。

2.培養共同愛好

夫妻要喺同一個空間生活多年，切忌長期各有各做嘢，要記得你哋係夫妻而唔係室友，一個人睇電視、一個人長時間上網等缺乏交流嘅活動，對婚姻無益，平時應該多啲進行可以一齊合作嘅活動，例如，一齊打波、改造家中裝飾，或者共同照顧寵物同煮嘢食等。

3.嘗試參與對方嘅興趣

一成不變嘅夫妻關係，會容易對另一半嘅付出習以為常。可以嘗試參與對方嘅興趣，例如另一半鍾意踢波，你可以嘗試了解足球知識，另一半熱愛運動，你都可以加入一齊做運動。咁樣可以共同見證對方嘅成長，大幅提升對彼此嘅認可度。

要白頭到老從來唔係只靠緣份，亦需要大家努力為段關係付出。夫妻關係亦都唔一定係一帆風順，若珍惜依段關係，雙方都要努力想辦法令關係越嚟越好，所以由今日開始，一齊同另一半玩盡佢喇！

Text：Mami Editorial

Photos：Shutterstock

Sources：美國丹佛大學婚姻與家庭研究中心